धनकुटा-१ सुकेपोखरीस्थित कोशी लोकमार्गमा बिहीबार साँझ भएको दुर्घटनामा धनकुटा-१ निगालेकी करिब ५२ वर्षीया ठोमा देवी ठकुरीको मृत्यु भएको जिल्ला प्रहरी कार्यालय धनकुटाका सूचना अधिकारी प्रहरी नायब उपरीक्षक हेमन्त भण्डारी क्षेत्रीले जानकारी दिए।
धनकुटा — धनकुटामा ट्रक र दुई मोटरसाइकल एकआपसमा ठोक्किँदा एक महिलाको मृत्यु भएको छ भने दुई जना घाइते भएका छन् ।
धनकुटा-१ सुकेपोखरीस्थित कोशी लोकमार्गमा बिहीबार साँझ भएको दुर्घटनामा धनकुटा-१ निगालेकी करिब ५२ वर्षीया ठोमा देवी ठकुरीको मृत्यु भएको जिल्ला प्रहरी कार्यालय धनकुटाका सूचना अधिकारी प्रहरी नायब उपरीक्षक हेमन्त भण्डारी क्षेत्रीले जानकारी दिए। प्रहरीका अनुसार हिलेबाट धनकुटातर्फ आउँदै गरेको प्रदेश १–०२–००२ ख ०४७४ नम्बरको ट्रकलाई सोही दिशाबाट आउँदै गरेको को १० प ९६८ नम्बरको मोटरसाइकलले ओभरटेक गर्ने क्रममा ठक्कर खाएपछि विपरीत दिशाबाट आउँदै गरेको को ३८ प ३०६८ नम्बरको अर्को मोटरसाइकलसमेत दुर्घटनामा परेको थियो ।
दुर्घटनामा को १० प ९६८ नम्बरको मोटरसाइकलमा सवार ठकुरीको घटनास्थलमै मृत्यु भएको हो । सोही मोटरसाइकलका चालक धनकुटा–३ निगालेका ५३ वर्षीय गुणराज ठकुरी गम्भीर घाइते भएका छन् । उनलाई उद्धार गरी उपचारका लागि जिल्ला अस्पताल धनकुटा पठाइएको डिएसपी हेमन्त भण्डारी क्षेत्रीले बताए ।
यस्तै, अर्को मोटरसाइकलका चालक मोरङको विराटनगर-१ का २० वर्षीय रोशन तामाङ सामान्य घाइते भएका छन् । उनको पनि जिल्ला अस्पताल धनकुटामा उपचार भइरहेको छ ।
विनोद घिमिरे कान्तिपुर संवाददाता हुन्।
