घलेम्दी हाइड्रो लिमिटेडले लामो समयदेखि साधारण सभा नडाकेको र सञ्चालक समितिको पदावधि समाप्त भएको भन्दै सर्वसाधारण सेयरधनीहरूले विशेष साधारण सभा माग गर्दै कम्पनीमा औपचारिक निवेदन दर्ता गराएका छन्।
लगानीकर्ता तिलक कोइरालाका अनुसार कम्पनीले विगत तीन वर्षदेखि साधारण सभा नगरेको, हाल कायम सञ्चालक समितिको म्याद गुज्रिसकेको र २००% हकप्रद सेयर जारी गरी संकलन गरिएको ११० करोड (१ अर्ब १० करोड) रकमको सदुपयोग तथा अवस्थाबारे सार्वजनिक जानकारी नगराएका कारण सेयरधनीहरू आन्दोलित भएका हुन्। कम्पनी ऐन, २०६३ को दफा ८२(३) बमोजिम कुल चुक्ता पूँजीको १० प्रतिशतभन्दा बढी (१६ करोड ५० लाखभन्दा बढी) सेयर स्वामित्व प्रमाणित गरी १५ जनाभन्दा बढी सर्वसाधारण सेयरधनीहरूले संयुक्त रूपमा निवेदन दिएका हुन्।
निवेदनमा ३० दिनभित्र विशेष साधारण सभा बुलाई नयाँ सञ्चालक समितिको निर्वाचन गर्ने, प्रबन्धपत्र तथा नियमावलीमा आवश्यक संशोधन गर्ने र हकप्रद सेयरबाट संकलित रकमको उपयोगबारे छलफल एवं निर्णय गर्ने माग राखिएको छ ।
.jpg)
.png)
