जिल्ला प्रशासनले तिहार, नेपाल संवत् र छठलाई सुरक्षित तथा मर्यादित बनाउन देउसी–भैलोको समयसीमा तोक्दै पटका र प्लास्टिकका फूलमा रोक लगाएको छ।
हेटौंडा — मकवानपुरमा राति ९ बजेपछि देउसी भैलो खेल्न नपाइने भएको छ । जिल्ला प्रशासन कार्यालय मकवानपुरले आसन्न तिहारमा देउसी-भैलोका लागि राति ९ बजेसम्मको समय निर्धारण गरेको हो ।
प्रशासनले बिहीबार एक सूचना जारी गर्दै तिहार, नेपाल संवत् तथा छठ पर्वलाई मर्यादित, शान्तिपूर्ण र सुरक्षित रुपमा मनाउन आग्रह सहित विभिन्न निर्देशनहरु जारी गरेको छ । प्रशासनले देउसी–भैलो खेल्ने समयसीमा तोक्नुका साथै पटका तथा प्लास्टिकका फूलगुच्छा बिक्री–वितरणमा पूर्ण रोक लगाएको छ ।
प्रशासनद्वारा जारी सूचना अनुसार तिहारमा खेलिने देउसी–भैलो तथा सांस्कृतिक मनोरञ्जनात्मक कार्यक्रम राति ९ बजेसम्म मात्र सञ्चालन गर्न पाइनेछ भने चाडपर्वका समयमा समाजमा अशान्ति फैलिन नदिन र दुर्घटना न्यूनीकरण गर्न प्रशासनले देहायका विषयमा कडाइ गरेको छ ।
स्वास्थ्य र सुरक्षामा प्रतिकूल असर पर्ने भएकाले पटका, भुइचम्पा, आतिशबाजी जस्ता प्रज्वलनशील पदार्थको ओसारपसार, भण्डारण, बिक्री तथा प्रयोगमा प्रशासनले पूर्ण रोक लगाइएको छ । वातावरण संरक्षणका लागि सरकारले राजपत्रमा प्रकाशित गरी प्रतिबन्ध लगाएकाले प्लास्टिकका फूल तथा मालाको उत्पादन, आयात, बिक्री वितरण वा भण्डारण नगर्न सचेत गराइएको छ ।
जुवातास र मदिरा सेवनमा कडाइः कानुनले निषेध गरेको सट्टेबाजी, जुवा, तास, लंगुरबुर्जा नखेल्न तथा सार्वजनिक स्थलमा मादक पदार्थ सेवन गरी होहल्ला र झैझगडा नगर्न चेतावनी दिइएको छ । अखाद्य तथा म्याद गुज्रेका सामग्री बिक्री, कृत्रिम अभाव सिर्जना र मूल्यवृद्धि नगर्न तथा सवारी साधनमा तोकिएभन्दा बढी भाडा नउठाउन र क्षमताभन्दा बढी यात्रु नबोक्न प्रशासनले निर्देशन दिइएको छ ।
दीप प्रज्वलन तथा विद्युतीय बत्तीहरुको प्रयोग गर्दा आगलागीको जोखिम रहने हुादा उच्च सतर्कता अपनाउन मकवानपुरका सहायक प्रमुख जिल्ला अधिकारी शेषकान्त पौडेलले आग्रह गरेका छन् । चाडपर्व मनाउँदा अरुलाई असर नपर्ने गरी खुसीयाली साट्न अनुरोध गरिएको छ भने प्रशासनले जारी गरेको निर्देशन विपरीत गतिविधि गरे/गराइएको पाइएमा प्रचलित कानुन बमोजिम कडा कारबाही गरिने जनाइएको छ ।
प्रताप विष्ट कान्तिपुरको हेटौडा संवाददाता हुन् । उनी स्थानिय राजनीतिक र सामाजिक मुद्धाबारे रिपोर्टिङ/टिप्पणी लेख्छन् ।
.jpg)
