सञ्चारमन्त्री विक्रम तिमल्सिनाले भने- ‘चलचित्रले संस्थागत रूपमा अनुमति पाइसकेपछि सहज रूपमा प्रदर्शन हुनुपर्छ र सर्जकको सिर्जनालाई सम्मान गर्दै उनीहरूको प्रदर्शन गर्ने अधिकारको संरक्षण गरिनुपर्छ ।’
काठमाडौँ — वसन्त निरौला निर्देशित फिल्म ‘पाँच पाण्डव’को प्रदर्शन तोकिएको मितिमै हुने भएको छ ।
सञ्चार तथा सूचना प्रविधि मन्त्रालयमा फिल्म निर्माण टिमसहित बिहान बसेको छलफलबाट फिल्म प्रदर्शन स्थगित नहुने निष्कर्ष निकालिएको केन्द्रीय चलचित्र जाँच समितिका विज्ञ सदस्य मनोज पण्डितले बताए ।
‘मिटिङमा चलचित्र जाँच समितिका पदाधिकारीहरू, सम्बन्धित चलचित्रकर्मीहरू र गृह मन्त्रालय तथा सञ्चार मन्त्रालयका प्रतिनिधिको उपस्थिति रहेको थियो,' पण्डितले कान्तिपुरसँग भने, 'चलचित्र जाँच समिति एक जिम्मेवार निकाय भएकाले यसले गरेको निर्णय र समितिको विश्वसनीयतालाई सधैं जोगाइराख्नुपर्छ । भविष्यमा पनि चलचित्रकर्मीहरूलाई प्रदर्शन गर्ने अधिकार र सुरक्षा दिनुपर्ने तथा फिल्मको प्रचारप्रसार गर्दा संवेदनशील हुनुपर्ने निष्कर्ष निकालियो ।'
सञ्चारमन्त्री विक्रम तिमल्सिनाले पनि यो फिल्मलाई रोक्ने कुनै नियत नरहेको र रोक्न नहुने बताएको सन्देश आफूहरुले पाएको पण्डितले बताए । 'चलचित्रले संस्थागत रूपमा अनुमति पाइसकेपछि सहज रूपमा प्रदर्शन हुनुपर्ने र सर्जकको सिर्जनालाई सम्मान गर्दै उनीहरूको प्रदर्शन गर्ने अधिकारको संरक्षण गरिने कुरा मन्त्रीज्यूले व्यक्त गर्नुभयो,' बैठकमा सञ्चारमन्त्रीको सन्देश उद्धृत गर्दै केन्द्रीय चलचित्र जाँच समितिका अध्यक्ष विष्णुप्रसाद कोइरालाले भनेका थिए ।
फिल्म निर्माण टिमका एक सदस्यले नेपालगन्जको हलमा केही व्यक्ति गएर फिल्म रिलिज गरे तोडफोड गर्ने धम्की दिएका भन्ने खबर आफूहरूले पाएको र यही खबर गृहसचिवसम्म पुगेपछि उनले सञ्चार मन्त्रालयलाई फोन गरेर यसबारे चासो दिएका थिए ।
फिल्मको नाम महाभारतका पात्रबाट लिइएको र रिलिज भएको गीतका केही दृश्यलाई लिएर हिन्दु धर्मको अपमान भएको भन्दै ‘पाँच पाण्डव’ फिल्मका विरुद्धमा केही दिनयता सामाजिक सञ्जालमा बहस भइरहेको थियो । तर निर्माण टिमले भने यो फिल्मको कथा महाभारतसँग सम्बन्धित नभएको प्रस्ट्याइसकेको छ ।
समर्पण कान्तिपुर मिडिया ग्रुपमा आबद्ध उनी कला संवाददाता हुन् । उनी फिल्म, नाटक र गीत संगीतका विविध आयाम र सामाजिक मुद्दाबारे रिपोर्टिङ गर्छन् ।
