अनलाइनखबर २०८३ कात्तिक १९ गते १२:५८
सन् १९७१ नोभेम्बर ४ मा हैदराबादमा जन्मिएकी तब्बूले १४ वर्षकै उमेरमा देव आनन्दको फिल्म ‘हम नौजवान’बाट अभिनय यात्रा सुरु गरेकी थिइन् । उनको वास्तविक नाम तबस्सुम फातिमा हाश्मी हो । देव आनन्दले नै उनलाई ‘तब्बू’ नाम दिएका थिए ।
‘जीत’, ‘साजन चले ससुराल’ र ‘बोर्डर’ जस्ता फिल्मबाट दर्शकमाझ चिनिएकी तब्बूले सन् १९९६ मा ‘माचिस’बाट आफ्नो अभिनयको फरक पक्ष देखाइन् । पञ्जाबको द्वन्द्वमा आधारित फिल्ममा वीरोको भूमिका निभाएकी उनले यही फिल्मबाट पहिलो राष्ट्रिय चलचित्र पुरस्कार जितिन् ।
‘अस्तित्व’मा महिला स्वतन्त्रताको प्रश्न उठाउने पात्रदेखि ‘चाँदनी बार’मा संघर्षरत बार डान्सरसम्मका भूमिका उनले जीवन्त बनाइन् । ‘चाँदनी बार’बाट दोस्रो राष्ट्रिय चलचित्र पुरस्कार जितिन् । ‘मकबूल’मा नकारात्मक छायाँ भएको चरित्र निभाएर उनले आफ्नो अभिनयको अर्को आयाम देखाइन् ।
तब्बूको अभिनय यात्रा भारतीय सिनेमामा मात्रै सीमित रहेन । सन् २००६ मा उनले हलिउड फिल्म ‘द नेमसेक’मा काम गरिन् । भारतीय मूलकी महिलाको भूमिका निर्वाह गरेकी उनले परिवार, सम्बन्ध र सांस्कृतिक पहिचानबीचको द्वन्द्वलाई स्वाभाविक अभिनयमार्फत प्रस्तुत गरेर अन्तर्राष्ट्रिय दर्शकमाझ पनि पहिचान बनाइन् ।
सन् २०१४ को ‘हैदर’मा गजाला मीर बनेर प्रशंसा बटुलेकी तब्बू ‘दृश्यम’मा कठोर प्रहरी अधिकारीका रूपमा देखिइन् । ‘दृश्यम २’मा पनि यही भूमिका दोहोर्याइन् । पारिवारिक द्वन्द्वदेखि अपराध अनुसन्धानसम्मका फरक चरित्रमा उनले आफ्नो अभिनय क्षमता प्रमाणित गरिन् ।
‘गोलमाल अगेन’मा हास्यरस र ‘अन्धाधुन’मा रहस्यमयी सिमीको भूमिकामा देखिएकी तब्बूले आफूलाई एउटै छविमा सीमित राखिनन् । रोमान्स, बोल्ड, गम्भीर, हास्य र एक्शनसम्मका भूमिकामा देखिएकी उनी आज पनि फरक चरित्र रोज्ने अभिनेत्रीका रूपमा चिनिन्छिन् ।
