पछिल्लो तीन सातामा मात्र इन्टरनेट जडानका लागि नेपाल टेलिकमको अनलाइन सेवा तथा कल सेन्टरमार्फत २८ हजार १९२ जनाले नाम टिपाएका छन् ।
काठमाडौँ — नेपाल टेलिकमको फाइबर इन्टरनेट सेवा जडान गर्ने नयाँ ग्राहकको सङ्ख्या पछिल्लो १८ दिनमै ११ हजार ७६४ पुगेको छ । प्रधानमन्त्री तथा मन्त्रिपरिषद्को कार्यालयले बुधबार आफ्नो फेसबुक पेजमार्फत दिएको जानकारीअनुसार असोज ३० देखि कात्तिक १६ गतेसम्मको अवधिमा उक्त सङ्ख्यामा ग्राहकले सेवा लिएका हुन् ।
डिजिटल नेपालको अभियानअन्तर्गत सरकारको विशेष पहलमा नेपाल टेलिकमबाट सहुलियत दरमा फाइबर इन्टरनेट सेवा लिने ग्राहकको सङ्ख्यामा उल्लेखनीय वृद्धि भएको विवरणमा उल्लेख छ । नयाँ जडान गर्ने ग्राहकमध्ये ४० प्रतिशतले वार्षिक ४ हजार ९ सय ९९ रुपैयाँको सहुलियत दरको प्याकेज रोजेको प्रधानमन्त्रीको कार्यालयले जनाएको छ ।
सर्वसाधारणबाट इन्टरनेट सेवा महँगो भएको गुनासो आएपछि त्यसलाई कसरी सम्बोधन गर्न सकिन्छ भन्ने विषयमा सरकारले निरन्तर गृहकार्य गर्दै आएको दाबी गरेको छ । यसै अनुरुप चालु आर्थिक वर्षका चाडपर्वसमेतलाई लक्ष्य गर्दै नेपाल टेलिकमले गत असोज ३० देखि सहुलियत दरमा फाइबर इन्टरनेट सेवा उपलब्ध गराउन थालेको भनिएको छ ।
यो सेवाबाट विशेषगरी आधारभूत इन्टरनेट सेवा आवश्यक पर्ने व्यक्ति तथा परिवार लाभान्वित भएको सरकारको दाबी छ । 'इन्टरनेट क्षमता आवश्यक भए पनि बढी मूल्यका प्याकेज लिनुपर्ने बाध्यतामा रहेका ग्राहकका लागि यो सेवा उपयोगी भएको छ,' सूचनामा उल्लेख छ।
गत वर्ष कात्तिक महिनाभरि जम्मा २ हजार ९८१ ग्राहकले मात्र एनटी फाइबर सेवा लिएका थिए । त्यसैगरी, पछिल्लो तीन सातामा मात्र इन्टरनेट जडानका लागि नेपाल टेलिकमको अनलाइन सेवा तथा कल सेन्टरमार्फत २८ हजार १९२ जनाले नाम टिपाएका छन् ।
'यसका साथै, नेपाल टेलिकमबाट दुर्गम क्षेत्रसहित मुलुकका विभिन्न १ हजार ६०० स्थानमा चालु आवभित्र फोरजी-एलटीई सेवा विस्तार गर्ने उद्देश्यले बोलपत्र आह्वान भइसकेको छ,' सूचनमा भनिएको छ, 'दूरसञ्चार सेवालाई थप गुणस्तरीय, विश्वसनीय, प्रतिस्पर्धी र सर्वसुलभ बनाउने विषय सरकारको प्राथमिकतामा परेको छ ।'
सरकारले चालु आवलाई दूरसञ्चार क्षेत्रको रूपान्तरणकारी वर्ष बनाउने लक्ष्य लिएको छ । यसका लागि आवश्यक नयाँ नीति, कानुन तथा संस्थागत र संरचनागत सुधार अघि बढाइने सूचनामा उल्लेख गरिएको छ ।
