सन् २०१४ को टी–२० विश्वकप विजेता श्रीलंकाका पूर्वकप्तान म्याथ्युज तेस्रो संस्करणको एनपीएल खेल्ने विदेशी खेलाडीमध्ये एक हुनेछन् ।
काठमाडौँ — श्रीलंकाका पूर्वकप्तान एन्जेलो म्याथ्युजले विराटनगर किङ्सबाट तेस्रो संस्करणको नेपाल प्रिमियर लिग (एनपीएल) खेल्ने भएका छन् ।
श्रीलंकाबाट सन् २०१४ को टी–२० विश्वकप जितेका म्याथ्युजले सबै प्रारूपको क्रिकेटमा राष्ट्रिय टिमको कप्तानी सम्हालेका छन् । दायाँ हाते अलराउन्डर म्याथ्युजले श्रीलंकाका लागि ९० टी–२० आई खेलमा ६ अर्धशतकसहित १४ सय १६ रन बनाउनुका साथै ४५ विकेट लिएका छन् भने २ सय २६ ओडीआई खेलमा ३ शतक र ४० अर्धशतकसहित ५ हजार ९ सय १६ रन बनाएका छन् । उनको नाममा १ सय २६ ओडीआई विकेटसमेत छन् ।
१ सय १९ टेस्टमा उनले १६ शतकसहित ८ हजार २ सय १४ रन बनाउनुका साथै ३३ विकेट लिएका छन् । २ सय ३३ टी–२० खेलमा म्याथ्युजले ४ हजार ९० रन र ४५ विकेट लिएका छन् ।
विराटनगरले यसअघि वेस्ट इन्डिजका स्टार अलराउन्डर आन्द्रे रसेललाई टिममा सामेल गरिसकेको छ भने शुभम रन्जाने र चरिथ असलंकालाई पनि अनुबन्ध गरिसकेको छ ।
सुवास रोकाया कान्तिपुर टिभीका संवाददाता हुन् ।
