दुई जनाको घटनास्थलमै मृत्यु भएको सूचना प्राप्त भएपछि प्रहरी टोली उद्धार तथा आवश्यक व्यवस्थापनका लागि घटनास्थलतर्फ खटिएको जिल्ला प्रहरी कार्यालय बझाङले जनाएको छ ।
बझाङ — बझाङको केदारस्युँ गाउँपालिका–७ भामचौरमा आज बिहान जिप दुर्घटना हुँदा दुई जनाको मृत्यु भएको प्रत्यक्षदर्शीले बताएका छन् ।
बिहान ९:१० बजे भएको दुर्घटनामा जिपमा करिब १२ देखि १५ जनासम्म सवार रहेको बताइएको छ । दुई जनाको घटनास्थलमै मृत्यु भएको सूचना प्राप्त भएपछि प्रहरी टोली उद्धार तथा आवश्यक व्यवस्थापनका लागि घटनास्थलतर्फ खटिएको जिल्ला प्रहरी कार्यालय बझाङले जनाएको छ ।
जिल्ला प्रहरी कार्यालयका प्रहरी निरीक्षक उपेन्द्र तिमिल्सैनाका अनुसार अस्थायी प्रहरी पोस्ट बिजगडाबाट दुई जना, अस्थायी प्रहरी पोस्ट बागथलाबाट दुई जना र जिल्ला प्रहरी कार्यालयबाट प्रहरी निरीक्षक तिमिल्सैनाकै कमाण्डमा सात जना प्रहरी घटनास्थलतर्फ परिचालन गरिएको छ ।
दुर्घटनास्थल जिल्ला प्रहरी कार्यालय बझाङबाट करिब ३५ किलोमिटर पश्चिममा पर्छ । मृतकको पहिचान, घाइतेको अवस्था र दुर्घटनाको कारणबारे विस्तृत विवरण आउन बाँकी रहेको प्रहरीले जनाएको छ ।
वसन्तप्रताप सिंह कान्तिपुरका बझाङ संवाददाता हुन् ।
