कीर्तिपुरमा हुने खेल जिते लुम्बिनी पाँच अंकसहित शीर्षस्थानमा पुग्नेछ भने पोखरा प्रतियोगितामा पहिलो जित र अंकको खोजीमा हुनेछ।
काठमाडौँ — नेपाल प्रिमियर लिग (एनपीएल) क्रिकेटमा मंगलबारको दोस्रो खेलमा लुम्बिनी लायन्स र पोखरा एभेन्जर्सबीच प्रतिस्पर्धा हुँदैछ ।
त्रिवि अन्तर्राष्ट्रिय क्रिकेट मैदान कीर्तिपुरमा हुने खेलमा लुम्बिनीलाई जित हात पार्दै शीर्ष स्थानमा उक्लने अवसर छ । पोखरा भने प्रतियोगितामा पहिलो जितको खोजीमा हुनेछ ।
लुम्बिनीले यसअघि खेलेका २ खेलमा १ जित हात पारेको छ भने शनिबारको खेलमा खेल रद्द भएपछि चितवनसँग अंक बाँडेको थियो । ३ अंकसहित पाँचौं स्थानमा रहेको लुम्बिनीले आजको खेल जितेमा ५ अंकसहित शीर्ष स्थानमा पुग्नेछ ।
पोखराले भने यसअघिका दुवै खेल गुमाएको छ । अंकविहीन पोखरा आठौं स्थानमा छ । पोखरालाई प्रतियोगितामा आफ्नो पहिलो जित निकाल्दै अंकको खाता खोल्ने अवसर हुनेछ ।
मंगलबारको पहिलो खेलमा विराटनगर किंग्सले जनकपुर बोल्ट्सलाई २ रनले पराजित गरेपछि शीर्ष स्थानको होड थप रोमाञ्चक बनेको छ । विराटनगर, कर्णाली याक्स र जनकपुरको समान ४ अंक रहेको छ । राम्रो नेट रनरेटका आधारमा विराटनगर शीर्ष स्थानमा छ ।
आजको खेलमा लुम्बिनीले जित हात पारेमा शीर्ष स्थानमा पुग्ने भएकाले पोखराविरुद्धको प्रतिस्पर्धा दुवै टोलीका लागि महत्त्वपूर्ण हुनेछ ।
विनोद पाण्डे कान्तिपुरका खेलकुद ब्यूरो प्रमुख हुन् ।
