वर्षाले अवरुद्ध सडकको पहिरो पन्छाएर मर्मत गरेपछि बाजुराका चार स्थानीय तह जोड्ने मार्तडी–कोल्टी मार्गमा सोमबारदेखि बस चल्न थालेका छन्।
बाजुरा — वर्षाका कारण जेठ अन्तिम सातादेखि अवरुद्ध मार्तडी–कोल्टी सडकमा करिब पाँच महिनापछि बस सेवा पुनः सुचारु भएको छ । सडक मर्मतपछि सोमबारदेखि मिनी बस सञ्चालनमा आएको हो।
जिल्लाको पूर्वी उत्तरी भेगका चार स्थानीय तह जोड्ने यो सडक खोलामा पुल नबनेको र जिल्ली लगायतका स्थानमा पहिरो खसेपछि अवरुद्ध भएको थियो । बस सेवा बन्द भएपछि स्थानीयले ठाउँठाउँमा जीप परिवर्तन गरेर यात्रा गर्नुपर्ने बाध्यता थियो । यात्रुको गुनासोपछि सोमबारदेखि बस सेवा पुनः सञ्चालनमा ल्याइएको प्रमुख जिल्ला अधिकारी मुक्तिराम रिजालले बताए ।
सोमबार नेपालगन्जबाट आएको मिनी बस सदरमुकाम मार्तडी हुँदै कोल्टी पठाइएको हो । सडक मर्मत गरी यातायात सञ्चालनमा ल्याइए पनि ठूला बस नियमित चल्ने अवस्था छ/छैन भन्नेमा अझै अन्योल रहेको मार्तडी संयुक्त बस काउन्टरका प्रतिनिधि सन्तोष डडालले बताए ।
करिब पाँच महिनादेखि अवरुद्ध सडक खण्डका विभिन्न ठाउँमा खसेको पहिरो पन्छाएर असोज अन्तिम सातादेखि मर्मत सुरु गरिएको थियो । बुढीनन्दा नगरपालिका, बडीमालिका नगरपालिका, जिल्ला प्रशासन कार्यालय बाजुरा र पूर्वाधार विकास कार्यालयको सहकार्यमा सडक पुनः सञ्चालनमा ल्याइएको हो ।
तिहारमा बस सेवा सञ्चालन गर्ने प्रतिबद्धताअनुसार सडक मर्मत थालिएको पूर्वाधार विकास कार्यालय अछामले जनाएको छ । भत्किएका ठाउँ सफा गर्ने र साँघुरो सडक फराकिलो बनाएर बस सञ्चालन गर्न सहज बनाउने काम भइरहेको कार्यालय प्रमुख जंगबहादुर थापाले बताए ।
बुढीनन्दा र बडीमालिका नगरपालिकासँग डोजर सञ्चालनका लागि सम्झौता गरेर सडक मर्मत भइरहेको उनले जानकारी दिए । दुवै नगरपालिकाले जेसीबी प्रयोग गर्ने र त्यसको रकम पूर्वाधार विकास कार्यालयले भुक्तानी गर्ने सहमति भएको थापाले बताए ।
मार्तडी–कोल्टी सडक पूर्वी उत्तरी भेगका चार स्थानीय तहका बासिन्दाको मुख्य यातायात मार्ग हो । यो सडक हुँदै छिमेकी जिल्ला हुम्ला, मुगु र कालीकोटका बासिन्दासमेत आवतजावत गर्छन् । बस सेवा पुनः सञ्चालनमा आएपछि यस क्षेत्रका बासिन्दालाई आवतजावतमा सहज हुने भएको छ ।
यो सडकमा २०८१ पुस २६ गते महाकाली यातायातको ना७ख ५८७३ नम्बरको नाटेश्वरी बस पहिलोपटक कोल्टी पुगेको थियो । गएको बर्खामा वर्षायाममा बस सेवा बन्द भएपछि मार्तडी–कोल्टी सडकमा जीपमार्फत यात्रा गर्नुपर्ने बाध्यता थियो । जीप व्यवसायीले विभिन्न खण्डमा यात्रुबाट चर्को भाडा असुल्दै आएका थिए । मार्तडीदेखि बाउली खोलासम्म १ सय ५०, बाउली खोलादेखि रजातोलीसम्म ४ सय र रजातोलीदेखि कोल्टीसम्म १ हजार १ सय रुपैयाँ भाडा लिने गरिएको थियो ।
स्थानीय प्रशासन र प्रहरीको निगरानी नहुँदा जीप व्यवसायीले मनपरी भाडा असुल्ने गरेको यात्रुको गुनासो थियो। बस सेवा सुचारु भएपछि भने मार्तडीदेखि कोल्टीसम्म ५ सय रुपैयाँमै यात्रा गर्न पाइने भएको छ । यसले पूर्वी उत्तरी भेगका बासिन्दालाई आवतजावतमा राहत पुग्ने अपेक्षा गरिएको छ ।
