काउनडाउन सुरु भएसँगै प्रतियोगिता हुने वा नहुने भन्ने अन्योल हटेको र अब निर्धारित समयमै प्रतियोगिता आयोजना हुनेमा ढुक्क हुन मुख्यमन्त्री मङ्गलबहादुर शाहीले आग्रह गरेका छन्।
कर्णाली प्रदेशमा आयोजना हुने दशौँ राष्ट्रिय खेलकुद प्रतियोगिताको ३० दिने काउनडाउन सुरु भएको छ। काउनडाउन सुरु भएसँगै प्रतियोगिता हुने वा नहुने भन्ने अन्योल हटेको र अब निर्धारित समयमै प्रतियोगिता आयोजना हुनेमा ढुक्क हुन मुख्यमन्त्री मङ्गलबहादुर शाहीले आग्रह गरेका छन्।
उनले प्रतियोगिता सफल बनाउन प्रदेश सरकारसहित तीनै तहका सरकार तयारीमा जुटिरहेको बताए। प्रतियोगिता आयोजनाका क्रममा देखिएका विभिन्न समस्या र विवाद समाधानका लागि पनि समन्वय भइरहेको उनको भनाइ थियो।
युवा तथा खेलकुदमन्त्री सस्मित पोखरेलले प्रतियोगिता आयोजनाका लागि आवश्यक तयारी र समन्वयमा जोड दिए। प्रतियोगितालाई सफल बनाउन सबै पक्षले आ–आफ्नो जिम्मेवारी पूरा गर्नुपर्ने उनको भनाइ थियो।
राखेपका सदस्यसचिव रामचरित्र मेहताले प्रतियोगिता आयोजनाका सबै प्रक्रिया अघि बढिसकेको बताए। निर्धारित समयमै प्रतियोगिता सञ्चालन गर्ने गरी आवश्यक तयारी भइरहेको उनले जानकारी दिए।
यसै अवसरमा प्रतियोगिताका लागि तयार पारिएको कर्णाली प्रदेशको खेलकुद गीत सार्वजनिक गरिएको छ। प्रतियोगिताको प्रचारप्रसारका लागि मस्कट र भिडियोसमेत तयार पारिएको युवा तथा खेलकुदमन्त्री पोखरेलले जानकारी दिए। ती सामग्री क्रमशः सामाजिक सञ्जालमार्फत सार्वजनिक गर्दै जाने उनले बताए।
प्रतियोगिता आयोजनामा प्रदेश सरकार, स्थानीय सरकारलगायत सबै पक्षलाई समन्वय र सहजीकरण गर्न आग्रह गरिएको छ।
ज्योति कटुवाल कान्तिपुरकी सुर्खेत संवाददाता हुन् ।
