अनलाइनखबर २०८३ कात्तिक १६ गते १४:१२
सन् १९९७ मा ‘यस बोस’को छायांकनका क्रममा शाहरुखले मुम्बईको एउटा भव्य भवन देखेका थिए। त्यसबेला त्यसको नाम ‘भिल्ला भिएना’ थियो। उनलाई त्यही घर मन परेको थियो । संयोगवश, चार वर्षपछि सन् २००१ मा उनले त्यही भवन किने, जुन आज ‘मन्नत’का नामले चिनिन्छ ।
शाहरुख खानको अर्को रोचक पक्ष हो, महिला सहकर्मीसँग घुलमिल हुन सक्ने उनको सहज स्वभाव। धेरै अभिनेत्रीले उनीसँग काम गर्दा आफूलाई सहज र सुरक्षित महसुस हुने बताउँदै आएका छन् । उनी सहकलाकारको कुरा सुन्ने, सम्मान गर्ने र सेटमा रमाइलो वातावरण बनाउने कलाकारका रूपमा चिनिन्छन् ।
शाहरुखको अभिनय यात्रा बलिउडबाट सुरु भएको होइन । उनले आठ वर्षको उमेरमै रामायणमा बाँदरको भूमिका निर्वाह गरेका थिए । बाल्यकालदेखि नै अभिनयमा रुचि राख्ने उनी पछि थिएटरमा जोडिए । त्यसपछि टेलिभिजनका ‘फौजी’ र ‘सर्कस’मार्फत दर्शकमाझ चिनिए ।
सन् २०१५ मा शाहरुखले बेलायतको एडिनबरा विश्वविद्यालयबाट मानार्थ विद्यावारिधि उपाधि पाए । अभिनयसँगै परोपकारी र मानवीय कार्यमा पुर्याएको योगदानको सम्मानमा विश्वविद्यालयले उनलाई यो उपाधि दिएको थियो ।
शाहरुखले पत्नी गौरीसँग मिलेर सन् २००२ मा रेड चिलिज इन्टरटेनमेन्ट स्थापना गरे । फिल्म निर्माण र भिजुअल इफेक्ट्समा सक्रिय यो कम्पनीसँगै उनी आईपीएल टोली कोलकाता नाइट राइडर्सका सहमालिक पनि हुन् । यसरी उनको व्यावसायिक यात्रा फिल्मदेखि क्रिकेटसम्म फैलिएको छ ।
