सल्यानमा स्क्रब टाइफसबाट थप एकको मृत्यु, मृतकको संख्या १० पुग्यो

सल्यानमा स्क्रब टाइफसबाट थप एक जनाको मृत्यु भएको छ। दार्मा गाउँपालिका–४ का ६२ वर्षीय जितबहादुर मल्लको नेपालगञ्जमा उपचारका क्रममा मृत्यु भएको हो।

सल्यान — सल्यानमा स्क्रब टाइफसबाट थप एक जनाको मृत्यु भएको छ। दार्मा गाउँपालिका–४ का ६२ वर्षीय जितबहादुर मल्लको नेपालगञ्जमा उपचारका क्रममा मृत्यु भएको हो। यससँगै जिल्लामा स्क्रब टाइफसबाट मृत्यु हुनेको संख्या १० पुगेको छ।

स्वास्थ्य सेवा कार्यालय सल्यानका अनुसार जिल्लामा हालसम्म ८१७ जनामा स्क्रब टाइफस संक्रमण पुष्टि भएको छ। संक्रमितमध्ये दार्मा गाउँपालिकामा सबैभन्दा बढी २८१ जना छन्। त्यस्तै, बागचौर नगरपालिकामा २४७, कुमाख गाउँपालिकामा ८२, जिल्ला अस्पताल सल्यानमा ६६, कपुरकोट गाउँपालिकामा ६९, छत्रेश्वरी गाउँपालिकामा ५१, बन्गाड कुपिण्डे नगरपालिकामा ११, त्रिवेणी गाउँपालिकामा ६, सिद्धकुमाख गाउँपालिकामा ३ र कालिमाटी गाउँपालिकामा २ जनामा संक्रमण पुष्टि भएको छ।

दार्मा गाउँपालिकाका स्वास्थ्य शाखा प्रमुख यज्ञबहादुर बस्नेतका अनुसार मल्ललाई असोज २८ गते गरिएको परीक्षणमा संक्रमण पुष्टि भएको थियो। जिल्ला अस्पतालबाट घर फर्किएका उनको श्वासप्रश्वासमा समस्या देखिएपछि थप उपचारका लागि घोराही हुँदै नेपालगञ्ज लगिएको थियो। उपचारकै क्रममा उनको मृत्यु भएको बस्नेतले बताए।

वर्षायाममा बढी देखिने यो रोगको संक्रमण पछिल्लो समय घटे पनि पूर्ण रूपमा नियन्त्रणमा आउन सकेको छैन। स्वास्थ्यकर्मीले घाँसदाउरा गर्दा शरीर ढाक्ने कपडा र बुट लगाउन, पञ्जा प्रयोग गर्न तथा घरवरपरका झाडी सफा राख्न आग्रह गर्दै आएका छन्।

विप्लव महर्जन कान्तिपुरका सल्यान संवाददाता हुन् ।