दसौं राष्ट्रिय खेलकुद प्रतियोगिताको तयारीका सम्बन्धमा आइतबार सुर्खेतमा भएको छलफलमा उनले उत्कृष्ट खेलाडी छनोट गरेर पदक जित्ने तयारीमा जुट्न कर्णाली प्रदेश खेलकुद विकास परिषद्लाई आग्रह गरे ।
काठमाडौँ — कर्णाली प्रदेशका मुख्यमन्त्री मंगलबहादुर शाहीले कर्णाली प्रदेशले पदक जित्ने तयारीमा लाग्नुपर्ने बताएका छन् । दसौं राष्ट्रिय खेलकुद प्रतियोगिताको तयारीका सम्बन्धमा आइतबार सुर्खेतमा भएको छलफलमा उनले उत्कृष्ट खेलाडी छनोट गरेर पदक जित्ने तयारीमा जुट्न कर्णाली प्रदेश खेलकुद विकास परिषद्लाई आग्रह गरे ।
बसोबास व्यवस्थापन उपसमितिद्वारा आयोजित छलफल कार्यक्रमलाई सम्बोधन गर्दै मुख्यमन्त्री शाहीले बजेटको चिन्ता नगर्न आग्रह गरे । उनले भने ,´तपाईँहरु राम्रा खेलाडी छनौट गर्नुस्, निष्पक्ष भएर खेलाडी छनौट गर्नुस्, राम्रा प्रशिक्षक ल्याउनुस् र पदक जित्ने तयारीमा लाग्नुस्, बजेटको कुनै समस्या हुँदैन।´
मागेको भन्दा बढी बजेट दिन प्रदेश सरकार तयार भएको जानकारी उनले दिए । दसौं राष्ट्रिय खेलकुद कर्णालीको लागि अवसर र चुनौती भएको बताउँदै उनले यसलाई उपयोग गर्नुपर्ने धारणा राखे ।
राष्ट्रिय खेलकुदको व्यवस्थापनका लागि प्रदेश सरकार, परिषद् वा सरकारी निकायले मात्र सम्भव नभएकाले सबै सरोकारवालाको उत्तिकै सहयोग र सहकार्य जरुरी रहेको बताए । प्रतियोगिताको आयोजक संघीय सरकार भए पनि कर्णाली प्रदेशमा हुने भएकाले कुनै कमीकमजोरी नहुने गरी सबै निकायबीच समन्वय हुनुपर्ने उनको भनाइ थियो । साथै उनले अब पनि प्रतियोगिता स्थगित हुन्छ कि भनेर आशंका नगर्न सबैलाई अपिल गरे ।
छलफलमा सामाजिक विकासमन्त्री जितबहादुर मल्लले कर्णाली प्रदेशले जिम्मेवारी पाएका चारवटै उपसमितिले हालसम्म सन्तोषजनक काम गरेको बताए ।
कार्यक्रममा प्रमुख सचिव राधिका अर्याल, वीरेन्द्रनगर नगरपालिकाका प्रमुख मोहनमाया ढकाल, प्रदेश प्रहरी प्रमुख जयराज सापकोटा, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयका प्रमुख एसपी मुकुन्द प्रसाद रिजाल, होटल व्यवसायी महासंघका पदमबहादुर शाही, तर्कबहादुर शाहीलगायतले सुझाव दिएका थिए ।
तृप्ति शाही कान्तिपुरकी सुर्खेत संवाददाता हुन् ।
