बुढीगण्डकी बाढीपछि स्थानीयले बनाएका काठेपुल सञ्चालनमा आएको केही दिनमै बगेपछि चुमभ्याली आवतजावत पुनः रोकिएको छ।
गोरखा — लगातारको बर्षाले चुमभ्याली जाने चुमनुब्री–६ लोक्पा सर्दिभीर क्षेत्रका चारवटै काठे पुल बगाएको छ । काठेपुल बगाएपछि चुमभ्याली आउजाउ फेरि ठप्प बनेको छ ।
२५ असोजको बुढीगण्डकी बाढीले सर्दिभीरको क्यान्टिलिभर (भीर खोपेर बनाएको) पुल बगाएर आउजाउ ठप्प बनेपछि सोही क्षेत्रमा चार वटा काठेपुल राखेर आउजाउ सुरु गरिएको थियो ।
केही दिनअघि संचालनमा आउका चार वटै काठेपुल शनिबार बिहान बाढीले बगाएको चुमनुब्री–६ लोक्पाका स्थानीय शेराप गुरुङले बताए । ‘१०/१५ दिनसम्म काम गरेर काठेपुल र बाटो निर्माण भएको थियो, काम गरेको पैसा पनि पाएको छैन, फेरि पुल र केही बाटो पनि भत्किएको छ,’ उनले भने,‘पालिकामा पनि कुरा गरिसकेका छौं, वडामा पनि कुरो भएको छ, भोलिबाटै फेरि काम सुरु गर्ने कि छलफल गरिरहेका छौं ।’
२५ असोजको बाढीले सर्दिभीरको क्यान्टिलिभर पुल र लोक्पानजिकैको झोलुङ्गे पुल बगाएपछि चुमनुब्री–६ चुम्चेत र वडा ७ को छेकम्पार आउजाउ दुई साता ठप्प बनेको थियो । पुल बगाएको ठाउँमा स्थानीयले काठेपुल राखेर केही दिनअघि मात्र आउजाउ सुरु गरेका थिए । ‘काठेपुल बनेपछि पर्यटकहरु पनि चुमभ्याली गएका थिए, खाली खच्चड पनि पास भएका थिए,’ उनले भने,‘गएराति खोला बढेर पुल बगाएपछि फेरि पहिलेकै अवस्थामा पुर्यायो ।’
चार वटै काठेपुल बगाएपछि चुम्चेत र छेकम्पार आउजाउ फेरि ठप्प बनेको चुमनुब्री गाउँपालिकाका अध्यक्ष निमा लामाले बताए । ‘आपतकालीन अवस्थाका लागि भनेर काठेपुल हालेका थियौं, चार वटै बगाएछ,’ उनले भने,‘अब मौसम हेरेर फेरि अध्ययन गरेर पुल निर्माण सुरु गछौं ।’ पुल नहुँदा चुम्चेत र छेकम्पार उपभोग्य सामग्री ढुवानी तथा आउजाउ ठप्प बनेको उनले बताए ।
हरिराम उप्रेती कान्तिपुरका गोरखा संवाददाता हुन् ।
