डेढ सयभन्दा धेरै अफगानी नागरिकहरुलाई निस्काशन गर्ने तयारीमा अमेरिका

'न्युयोर्क टाइम्स’ पत्रिकाले जनाए अनुसार, एकैपटक गरिएको अफगान नागरिकहरूको यो सबैभन्दा ठूलो निष्कासन अभियान हो । १५० भन्दा बढी अफगान आप्रवासीहरूलाई फिर्ता पठाउने तयारी गरिएको छ

वासिङ्टन — अमेरिकाले आफ्नो देशमा आश्रय लिइरहेका केही अफगान आप्रवासीहरूलाई निस्कासन (डिपोर्ट) गर्ने योजना बनाएको छ । एक अमेरिकी अधिकारी र  मानव अधिकारवादी समूहहरूको गठबन्धनले शुक्रबार यस विषयमा जानकारी दिएका हुन् ।

'न्युयोर्क टाइम्स’ पत्रिकाले जनाए अनुसार, एकैपटक गरिएको अफगान नागरिकहरूको यो सबैभन्दा ठूलो निष्कासन अभियान हो । १५० भन्दा बढी अफगान आप्रवासीहरूलाई फिर्ता पठाउने तयारी गरिएको छ ।

न्युयोर्क टाइम्सका अनुसार अमेरिकाले लुइसियानामा दर्जनौँ अफगान आप्रवासीहरूलाई नियन्त्रणमा लिएको छ र उनीहरूलाई डिपोर्ट गर्ने योजना बनाइरहेको छ । न्युयोर्क टाइम्सका अनुसार सोमबारसम्ममै पहिलो निस्कासन अभियान उडान हुन सक्नेछ।

अफगान इभाक संस्थाका प्रमुख शोन भानडाइभरका अनुसार डिपोर्टको जोखिममा परेका धेरैजसो व्यक्तिहरु सन् २०२१ मा तालिबानको कब्जापछि अमेरिका आएका थिए ।

भान डाइभरले भने, ‘डिपोर्ट हुन लागेका केही व्यक्तिहरू अमेरिकी फौजसँगै काँधमा काँध मिलाएर लडेका सहयोद्धाका छोराछोरी तथा दाजुभाइहरू हुन् । उनीहरू त्यस्ता परिवार हुन्, जो पहिल्यैदेखि तालिवानको निशानामा छन् ।’

एक अमेरिकी अधिकारीका अनुसार उनीहरूलाई पाकिस्तानको बाटो हुँदै डिपोर्ट गरिनेछ । तालिबानसँग कूटनीतिक सम्बन्ध नभएका कारण वासिङ्टनले प्रत्यक्ष रूपमा अफगानिस्तान उडान व्यवस्था गर्न सक्दैन ।

राष्ट्रपति डोनल्ड ट्रम्पले आफ्नो कडा आप्रवासन नीति र डिपोर्टेसन अभियानको मुख्य उद्देश्य देशको आन्तरिक सुरक्षा सुदृढ गर्नु रहेको बताउँदै आएका छन् । तर, अधिकारवादीहरूले भने यस प्रकारको धरपकडले कानुनसम्मत प्रक्रिया र वाक स्वतन्त्रताको उल्लङ्घन गरेको गरेका छन् । यस्ता कदमले अल्पसंख्यकहरूका लागि असुरक्षित वातावरण सिर्जना गरेको उनीहरुले बताएका छन् ।

भानडाइभरले अमेरिकामा रहेका अफगानहरूलाई डिपोर्टेसनबाट बचाउन उनीहरूलाई अस्थायी संरक्षित कानुनी दर्जा (टीपीएस) प्रदान गर्ने विधेयक पारित गर्न अमेरिकी संसद् (कंग्रेस) सँग आग्रह गरेका छन् ।