फुयाँलको बयानपछि न्यायाधीश र विवादित विचौलियाबीचको सम्बन्धबारे बहस चर्किएको छ, जसले सर्वोच्चको बैठकलाई थप चासोको विषय बनाएको छ।
काठमाडौँ — सर्वोच्च अदालतका न्यायाधीश हरि फुयाँल र हाल थुनामा रहेका इनम सापकोटाका बीचमा फरक फरक मुद्दाका विषयमा संवाद र भेटघाट भएको विषय सार्वजनिक भएपछि न्यायालय विवादमा तानिएको छ । अदालतको विश्वासनीयतामा प्रश्न उठेको छ । न्यायाधीश हरि फुयाँलले यो प्रकरणमा आफ्नो सफाइ पेश गर्दै इनमले आफू प्रधानमन्त्रीकै मान्छे भएको भन्दै आफूबाहेक अन्य न्यायाधीशलाई समेत दबाबमा पारेको बयान मिडियामा दिएका छन् । फुयाँलले आफूमात्र होइन, अरु न्यायाधीशसँग पनि इनमको कुरा हुने गरेको र सामुहिक रुपमा भेटेको समेत बयान दिएपछि न्यायालयभित्र खैलाबैला मच्चिएको छ। यति विवादित विचौलियासँग न्यायाधीशहरुको हिमचिमको अर्थ के हुन्छ ? यो विषयमा अब न्यायाधीशहरुमाथि छानबिन हुनुपर्दैन ? यदि पर्छ भने छानबिनको बाटो के ? यो सबै घटनाका बीचमा आज सर्वोच्च अदालतको पूर्ण बैठक बसेको छ। बैठकमा के भयो ?
