समाचार गलत भए त्यसको कानुनी उपचार खोज्ने व्यवस्था हुँदाहुँदै पत्रकारलाई प्रहरीमार्फत साइबर ब्युरो पुर्याउनु कानुनी राज्यको उपहास भएको उनको भनाइ छ ।
काठमाडौँ — नेपाल पत्रकार महासंघका उपाध्यक्ष दीपक आचार्यले समाचार लेखेकै आधारमा पत्रकारमाथि भइरहेको प्रहरी धरपकडप्रति आपत्ति जनाएका छन् ।
समाचारको विषयलाई लिएर सरकारले पत्रकारलाई पक्राउ गर्ने, सञ्चारमाध्यमका कार्यालयमा प्रहरी पठाउने र पत्रकारको खोजी गर्ने कार्यले प्रेस तथा अभिव्यक्ति स्वतन्त्रतालाई कमजोर बनाउने उनले बताएका छन् ।
'समाचार लेखेकै आधारमा सरकारले यसरी अनावश्यक खालको धरपकड गर्ने, आतंक सिर्जना गर्ने र प्रेस तथा अभिव्यक्ति स्वतन्त्रतालाई कमजोर बनाउने एवं संकुचन गर्ने कार्य गरेको छ,' आचार्यले भने, 'भयरहित वातावरणमा काम गर्न नदिने यो कदम घोर निन्दनीय र आपत्तिजनक छ।'
समाचार गलत भए त्यसको कानुनी उपचार खोज्ने व्यवस्था हुँदाहुँदै पत्रकारलाई प्रहरीमार्फत साइबर ब्युरो पुर्याउनु कानुनी राज्यको उपहास भएको उनको भनाइ छ ।
'समाचार यदि गलत भए त्यसका लागि सम्बन्धित निकायमा बहस–पैरवी चलाउन सकिने कानुनी प्रावधानहरू हुँदाहुँदै सरकारले पत्रकारलाई जबर्जस्ती साइबर ब्युरोमा धकेलेर कानुनी राज्यको उपहास गरेको छ,' उनले भने ।
पत्रकारहरूमाथि भइरहेको कारबाही र धरपकडको विरोधमा नेपाल पत्रकार महासंघले आधिकारिक विज्ञप्ति तयार गरी सार्वजनिक गर्ने तयारी गरिरहेको पनि आचार्यले जानकारी दिए ।
-1200x560.jpg)