१४ मेगावाटको घारखोला जलविद्युत् आयोजना र १८ मेगावाटको मध्य मोदी जलविद्युत् आयोजनाको बिजुली भारतको प्रतिस्पर्धी दरमा बिजुली बिक्री गर्न अनुमति
काठमाडौँ — भारतले दुई जलविद्युत् आयोजनाको बिजुली बिक्री गर्न अनुमति दिएको छ । १४ मेगावाटको घारखोला जलविद्युत् आयोजना र १८ मेगावाटको मध्य मोदी जलविद्युत् आयोजनाको बिजुली भारतको विद्युत् भारतीय ऊर्जा एक्सचेन्ज (आईएक्स) को डेअहेड मार्केट (डीएम) तथा रियल टाइम मार्केट (आरटीएम) मा प्रतिस्पर्धी दरमा बिजुली बिक्री गर्न अनुमति दिएको हो ।
दुई आयोजनाको बिजुली ३१ अगस्ट २०२७ सम्म बिक्री गर्न मिल्ने गरी भारतले अनुमति दिएको नेपाल विद्युत् प्राधिकरणले जनाएको छ । १० भदौमा आएको भोटेकोशीको बाढीले भारत र बंगलादेश निर्यात हुने त्रिशूलीको १८.६ मेगावाट र चिलिमेको २१.४ मेगावाट र देवीघाट जलविद्युत् आयोजनाको १४.६ मेगावाट बिजुली बिक्री हुँदै आए पनि क्षति पुगेको थियो ।
भारतले बंगलादेशमा निर्यात हुने त्रिशूली र चिलिमे जलविद्युत् आयोजनाको विकल्पमा आईएक्समा स्वीकृति पाइसकेका काबेली बी १ र सोलुखोला जलविद्युत् आयोजनालाई बंगलादेशमा बिक्री गर्ने अनुमति दिइसकेको छ ।
देवीघाटको विकल्पमा तल्लो मोदी जलविद्युत् आयोजनाको बिजुली द्विपक्षीय बजारमा बिक्री गर्न मिल्ने गरी अनुमति दिएको हो । यसअघि काबेली बी १ को २४.३ मेगावाट, सोलुखोलाको २२.८ मेगावाट र तल्लो मोदी जलविद्युत् आयोजनाको १९.४ मेगावाट बिजुली भारतको प्रतिस्पर्धी बजारमा मात्रै बिक्री हुँदै आएको छ ।
यसअघि १२ सय मेगावाटका ३७ जलविद्युत् आयोजनाको बिजुली भारत र बंगलादेशमा निर्यात गर्ने अनुमति पाएको थियो । अहिले दुई जलविद्युत् आयोजनाको बिजुली थपिए पनि कुल निर्यात क्षमता १,१७९ मेगावाटमा सीमित भएको छ ।
