रौतहटमा ट्र्याक्टर र मोटरसाइकल ठोक्किएर भएको दुर्घटनामा एक प्रहरी जवानको मृत्यु भएको छ । दुर्घटनामा उनकी श्रीमती गम्भीर घाइते भएकी छन् ।
रौतहट — रौतहटको दुधिअवा–बालचनपुर सडक खण्डमा ट्र्याक्टर र मोटरसाइकल ठोक्किएर भएको दुर्घटनामा एक प्रहरी जवानको मृत्यु भएको छ । दुर्घटनामा उनकी श्रीमती गम्भीर घाइते भएकी छन् ।
जिल्लाको फतुवा विजयपुर नगरपालिका–११ राँगी टोलस्थित दुधिअवा–बालचनपुर सडक खण्डमा दुधिअवाबाट बालचनपुर आउँदै गरेको ना २ त ४७८६ नम्बरको ट्र्याक्टर र विपरीत दिशाबाट जाँदै गरेको बागमती प्रदेश ०२–०५३ प ८२०२ नम्बरको मोटरसाइकल बिहीबार साँझ ठोक्किँदा दुर्घटना भएको हो । दुर्घटनामा बाराको सिमरनगढस्थित इलाका प्रहरी कार्यालयमा कार्यरत ३५ वर्षीय प्रहरी जवान सुभाष चौधरीको मृत्यु भएको जिल्ला प्रहरी कार्यालय गौरका डीएसपी वसन्त गौतमले जानकारी दिए ।
मोटरसाइकलको पछाडि सवार उनकी ३० वर्षीया श्रीमती प्रहरी जवान निशा खड्का गम्भीर घाइते भएकी छन् । उनको दाहिने खुट्टा भाँचिएको प्रहरीले जनाएको छ । दुर्घटनामा घाइते दुवैलाई उपचारका लागि वीरगन्जस्थित बयोधा अस्पताल पठाइएको थियो । अस्पतालमा चिकित्सकले राति प्रहरी जवान चौधरीलाई मृत घोषणा गरेका थिए ।
गम्भीर घाइते निशाको सोही अस्पतालमा उपचार भइरहेको इलाका प्रहरी कार्यालय सिमरनगढका प्रमुख प्रहरी निरीक्षक कृष्णदेव साहले बताए । दुर्घटनाको खबर पाउनासाथ रौतहटको प्रहरी चौकी दुधिअवाबाट टोली घटनास्थलमा पुगेर घाइतेको उद्धार गरेको थियो ।
रौतहटको गुजरा नगरपालिका–४ पोखरिभिन्डा घर भएका प्रहरी जवान चौधरी र खड्का फरार प्रतिवादीहरू पत्ता लगाउन बाराबाट खटिएका थिए । दुवै सादा पोसाकमा कामको सिलसिलामा खटिएको प्रहरी निरीक्षक साहले बताए ।
‘दुवै जना श्रीमान्–श्रीमती मोटरसाइकलमा जाँदा फरार प्रतिवादीहरूले थाहा पाउँदैनन् भनेर खटाएको हुँ,’ उनले भने, ‘गाउँबाट फर्कंदै गर्दा दुःखद घटना भयो । घटनाको अनुसन्धान हुँदै छ ।’ घाइते निशाको बयोधा अस्पतालको आईसीयूमा उपचार भइरहेको प्रहरीले जनाएको छ ।
शिव उनी कान्तिपुरका संवाददाता हुन् । रौतहटलाई केन्द्र बनाएर उनले मधेश प्रदेशको राजनीति, सामाजिक र आर्थिक विषयमा रिपोर्टिङ गर्छन् ।
