कप्तान सोमपाल कामीको ऐतिहासिक अलराउन्ड प्रदर्शनप्रेरित कर्णाली याक्सले नेपाल प्रिमियर लिग (एनपीएल) मा बिहीबार विराटनगर किंग्समाथि १ बल बाँकी छँदा ४ विकेटको अविश्वसनीय जित दर्ता गरेको छ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको थ्रिलर खेलमा विराटनगरले दिएको १८७ रनको विशाल लक्ष्य कर्णालीले १९.५ ओभरमा ६ विकेट गुमाएर पूरा गर्यो।
बलिङमा ४ विकेट लिएका कप्तान सोमपालले ब्याटिङमा पनि अविजित ६२ रनको विष्फोटक इनिङ्स खेल्दै टोलीलाई हारको मुखबाट निकालेर सनसनीपूर्ण जित दिलाए।
अन्तिम १२ बलमा जितका लागि २३ रन चाहिएको तनावपूर्ण अवस्थामा सोमपाल र गुलशन झाले धैर्य र आक्रामकताको सन्तुलन मिलाउँदै १९.५ ओभरमै खेल समाप्त पारे।
कप्तान सोमपालले मात्र ३२ बलमा ४ चौका र ३ छक्का प्रहार गर्दै अविजित ६२ रनको म्याच-विनिङ इनिङ्स खेले। उनले २७ बलमै आफ्नो अर्धशतक पूरा गरेका थिए।
अर्को एन्डबाट उनलाई उत्कृष्ट साथ दिएका गुलशन झाले २१ बलमा २ चौका र २ छक्कासहित अविजित २८ रन बनाए। दुई ब्याटरबीच सातौँ विकेटका लागि अविजित ६४ रनको निर्णायक साझेदारी भयो।
विशाल लक्ष्य पछ्याएको कर्णालीको सुरुवात भने निकै खराब थियो। विराटनगरका बलर एन्जेलो म्याथ्युजले घातक बलिङ गर्दै शीर्ष क्रम ध्वस्त पारेपछि कर्णाली ६.५ ओभरमै ५७ रन जोड्दा ५ विकेट गुमाएर संकटमा परिसकेको थियो।
अरिफुल इस्लामले १२ बलमा ३२ र दीपक डुम्रेले ११ बलमा २० रनको छोटो क्यामियो खेले पनि ओपनर मार्क वाट १, हुसेन तलत शून्य र अकबर अली १ रनमै पेभेलियन फर्किएका थिए।
त्यसपछि क्रिजमा आएका पवन सर्राफ र कप्तान सोमपालले छैटौं विकेटका लागि ६६ रनको साझेदारी गर्दै कर्णालीको आशा जीवित राखेका थिए। पवनले २८ बलमा ३६ रनको महत्त्वपूर्ण योगदान दिए।
विराटनगरका लागि एन्जेलो म्याथ्युजले ४ ओभरमा २५ रन खर्चेर ३ विकेट लिए भने कप्तान सन्दीप लामिछाने, चरिथ असालंका र प्रतिश जिसीले १-१ विकेट हात पारे।
यसअघि टस हारेर पहिले ब्याटिङ गरेको विराटनगरले निर्धारित २० ओभरमा ७ विकेट गुमाउँदै १८६ रनको बलियो योगफल खडा गरेको थियो। विराटनगरका लागि विकेटकिपर-ब्याटर लोकेश बमले मात्र ५२ बलमा ३ चौका र ९ छक्का प्रहार गर्दै विष्फोटक ८७ रन बनाएका थिए।
यस्तै एन्जेलो म्याथ्युजले ३१ र आन्द्रे रसेलले १५ बलमा २७ रन जोडेका थिए।
तर विराटनगरको त्यो विशाल इनिङ्सलाई रोक्न कर्णालीका कप्तान सोमपालले घातक बलिङ गर्दै ४ ओभरमा ३३ रन खर्चेर सर्वाधिक ४ विकेट लिएका थिए। बलिङ र ब्याटिङ दुवैमा चम्किएका सोमपालको प्रदर्शनसामु लोकेशको ८७ रनको इनिङ्स अन्ततः छायामा पर्न पुग्यो।
लगातार दोस्रो जितसँगै कर्णालीले अंकतालिकामा ४ अंक जोडेको छ भने विराटनगरले लगातार दोस्रो हार व्यहोरेको छ।
प्रकाशित: १२ कार्तिक २०८३ २०:३९ बिहीबार
