लोकेश बमले ८७ रन बनाएपछि विराटनगरले २० ओभरमा सात विकेट गुमाउँदै कर्णालीसामु १८७ रनको लक्ष्य प्रस्तुत गर्यो।
काठमाडौँ — लोकेश बमले विस्फोटक ब्याटिङ गरेपछि विराटनगर किंग्सले नेपाल प्रिमियर लिग क्रिकेटको बिहीबारको दोस्रो खेलमा कर्णाली याक्सलाई १ सय ८७ रनको लक्ष्य दिएको छ ।
टस हारेपछि ब्याटिङमा आएको विराटनगरले निर्धारित २० ओभरमा ७ विकेट गुमाई १ सय ८६ रन बनाएको हो । जारी प्रतियोगितामा यो उच्च स्कोर पनि हो ।
लोकेश ५२ बल खेली ३ चौका र ९ छक्का प्रहार गरी ८७ रन बनाई सोमपाल कामीको बलमा कट एन्ड बोल्ड भए । लोकेशले एन्जेलो म्याथ्युजसँग तेस्रो विकेटमा ४१ बलमा ७१ रनको साझेदारी गरे । म्याथ्युजले २३ बल खेली ४ चौका प्रहार गर्दै ३१ रन बनाए ।
हुसैन तलातले फालेको १४औं ओभरमा विराटनगर किंग्सले २४ रन जोड्दा लोकेशले २ छक्का र १ चौका प्रहार गरेका थिए । कर्णालीका कप्तान सोमपालले लोकेशसहित म्याथ्युज र आन्द्रे रसेललाई आउट गरी विराटनगरलाई ठूलो स्कोर बनाउनबाट रोक्ने प्रयास गरेका थिए ।
यसअघि लोकेशका ओपनिङ जोडी इमरान शेख मार्क वाटको बलमा आउट भए । चारिथ असलंकाले ३ रनमात्र बनाउन सके । सेहन जयसूर्या ११ रन बनाई दोस्रो रन लिने चक्करमा रनआउट भए । सोमपालले ४ ओभरमा ३३ रन खर्चेर ४ विकेट लिए ।
विनोद पाण्डे कान्तिपुरका खेलकुद ब्यूरो प्रमुख हुन् ।
