अघिल्लो दिनको तुलनामा बिहीबार नेप्से १.१८ प्रतिशतले बढेको हो । यससँगै समग्र नेप्से २ हजार ६ सय ९५.६० अंकमा उक्लेको हो ।
काठमाडौँ — सेयर कारोबार मापक नेप्से परिसूचकमा बिहीबार ३१.५४ अंकले बढेको छ । बुधबारभन्दा यो केही बढी हो । बुधबार सेयर बजार ३३.२९ अंकले बढेर बन्द भएको थियो । बिहीबार नेप्सेले बुधबारकै जस्ताे प्रवृति पछ्याएको हो । अघिल्लो दिनको तुलनामा बिहीबार नेप्से १.१८ प्रतिशतले बढेको हो । यससँगै समग्र नेप्से २ हजार ६ सय ९५.६० अंकमा उक्लेको हो ।
सो दिन कारोबारमा आएकामध्ये १८१ कम्पनीको सेयर मूल्य बढ्दा ९१ वटाको घट्यो । बाँकी ६ कम्पनीको सेयर मूल्य स्थिर छ ।
सो दिन कारोबारमा आएका १३ उपसमूहमध्ये सबैको परिसूचक बढेपछि नेप्से दोहोरो अंकले बढ्न टेवा पुगेको हो ।
बिहीबार कुल ६९ हजार ६ सय १९ पटकको कारोबारमा २ करोड ३२ लाख ५८ हजार ९ सय कित्ता सेयर किनबेच भए । ती किनबेचमा ८ अर्ब ५७ करोड रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम बढेको हो ।
बुधबार कुल ६३ हजार ७ सय ४४ पटकको कारोबारमा १ करोड ९३ लाख ९७ हजार ५ सय ४८ कित्ता सेयर किनबेच भएको थियो । ती किनबेचमा ७ अर्ब ४५ करोड ८६ लाख रुपैयाँ बराबरको सेयर कारोबार भएको थियो ।
बिहीबार बेनी हाइड्रोपावरको सेयर मूल्य सबैभन्दा बढी १५ प्रतिशतले बढेको छ । एनआरएन इन्फ्रास्टक्चर एण्ड डेभलपमेन्टको सेयर मूल्य सबैभन्दा बढी ३.६५ प्रतिशतले घटेको छ । कारोबार रकमका आधारमा घलेम्दि हाइड्रो सबैभन्दा अघि छ । प्रतिकित्ता ३ सय ३५ रुपैयाँका दरले यो कम्पनीको ३५ करोड ६१ लाख ६८ हजार रुपैयाँ बराबरको सेयर कारोबार भएको छ ।
