अछामको सदरमुकाम मंगलसेनलाई ग्रामीण क्षेत्रसँग जोड्ने निर्वाचन क्षेत्र रणनीतिक सडक निर्माणको ठेक्का अन्त्य गरिएको छ। पटक–पटक म्याद थप गर्दा पनि निर्माणले गति लिन नसकेपछि सडक डिभिजन कार्यालय साँफेबगरले ठेक्का तोड्ने निर्णय गरेको हो।
२०७९ वैशाख १६ गते सम्झौता भएको यो सडक २०८२ वैशाख १६ गतेभित्र निर्माण सम्पन्न गरिसक्नुपर्ने थियो। निर्धारित अवधिमा काम पूरा नभएपछि निर्माण व्यवसायीलाई २०८३ वैशाख १६ गतेसम्मको थप समय दिइएको थियो। तर, थपिएको म्याद सकिँदासमेत काम पूरा हुन सकेन।
ठेक्का अन्त्य हुँदासम्म सडकको भौतिक प्रगति १९.८३ प्रतिशतमा सीमित थियो। निर्माण व्यवसायीलाई पटक–पटक काम अघि बढाउन निर्देशन दिँदा पनि सडक कटान र आवश्यक संरचना निर्माणले अपेक्षित गति लिन नसकेपछि कार्यालयले ठेक्का तोड्ने निर्णय गरेको हो।
१० किलोमिटर लामो सडक निर्माणका लागि ३९ करोड ९९ लाख २९ हजार रुपैयाँ लागत अनुमान गरिएको थियो। ठेक्का अन्त्य गरेपछि सडक डिभिजन कार्यालयले निर्माण व्यवसायीलाई ३८ करोड २३ लाख ९६ हजार ४९३ रुपैयाँ दाखिला गर्न पत्राचार गरेको छ।
यससँगै सडक डिभिजन कार्यालय साँफेबगरले लामो समयदेखि अलपत्र रहेका सडक तथा पुल निर्माणसम्बन्धी ६ वटा रुग्ण ठेक्का अन्त्य गरेको जनाएको छ। सन् २०१९ अर्थात् २०७६ सालदेखि काम रोकिएका वा अलपत्र अवस्थामा रहेका योजनाका ठेक्का पनि यस प्रक्रियामा समेटिएका छन्।
ठेक्का अन्त्य गरिएका अन्य योजनामा साँफे–मार्तडी सडक मर्मत, चौखुट्टे क्षेत्रमा सडक मर्मत तथा नाली निर्माण, बाजुराको कोल्टी–कवाडी–बिच्छ्याँसैन सडक र मंगलसेन–सुवाखाँद–खेतगैरे–जुलिमारे–ढकारी सडक रहेका छन्।
(65).jpg)
