सूचीकरणको पहिलो दिन कम्पनीको शेयर २१ प्रतिशतभन्दा बढी बढ्दै बजार पूँजीकरण १२.५ खर्ब भारतीय रुपैयाँ पुगेको छ ।
काठमाडौँ — भारतीय अर्बपति मुकेश अम्बानीको दूरसञ्चार कम्पनी, जियो प्लाटफर्म्सले प्रारम्भिक सार्वजनिक निष्कासन (आईपीओ) मार्फत ३.२ अर्ब अमेरिकी डलर (३०२ अर्ब भारतीय रुपैयाँ) संकलन गरेको छ । शेयर बजारमा सूचीकृत भएको पहिलो दिन, बुधबार नै कम्पनीको शेयर मूल्य २१ प्रतिशतभन्दा बढीले वृद्धि भएको थियो । यससँगै जियोको बजार पूँजीकरण १२.५ खर्ब भारतीय रुपैयाँ (१३१ अर्ब अमेरिकी डलर) पुगेको भारतीय सञ्चार माध्यमले जनाएका छन् ।
सूचीकरणपछि जियो आफ्नै प्यारेन्ट कम्पनी रिलायन्स इन्डस्ट्रिजपछि भारतको दोस्रो सबैभन्दा मूल्यवान् सार्वजनिक कम्पनी बनेको छ । सीएनबीसी का अनुसार जियोले प्रतिशेयर १ हजार १ सय १९ भारतीय रुपैयाँका दरले २७ करोड शेयर बिक्रीमा ल्याएको थियो । बम्बे स्टक एक्सचेन्ज (बीएससी) को तथ्यांकअनुसार यो आईपीओमा २२ गुणाभन्दा बढी आवेदन परेका थिए ।
जियो प्लाटफर्म्सका प्रबन्ध निर्देशक आकाश अम्बानीका अनुसार अक्टोबर २१ मा बिक्री खुला भएको ९५ मिनेटभित्रै आईपीओ बिक्री भइसकेको थियो । जियो प्लाटफर्म्समा रिलायन्स इन्डस्ट्रिजको ६६ प्रतिशतभन्दा बढी स्वामित्व छ भने मेटाअन्तर्गतको संस्था ‘जाधु होल्डिङ्स’को झन्डै १० प्रतिशत र गुगल इन्टरनेसनलको ७.७ प्रतिशत शेयर रहेको छ ।
अन्तर्राष्ट्रिय समाचार संस्था रोयटर्सका अनुसार अम्बानी परिवारले जियोको कीर्तिमानी आईपीओको सफलतापछि मुम्बईस्थित रिलायन्स कर्पोरेट पार्कमा भव्य उत्सव मनाएका छन् । सो कार्यक्रममा ड्रोन प्रदर्शनी, डीजे प्रस्तुति, सांगीतिक कार्यक्रम र खानाका विभिन्न स्टल राखिएका थिए । रिलायन्सकी कर्मचारी श्वेता महेन्द्रले सामाजिक सञ्जाल ‘एक्स’ मा ‘दिवालीभन्दा अघिको दिवाली’ भन्दै सम्पूर्ण परिसर उत्सवमय बनेको उल्लेख गरेकी छन् ।
द न्यु योर्क टाइम्समा पत्रकार एलिक्स ट्राभेलीको समाचारअनुसार जियोको शेयर सूचीकरणको पहिलो दिन शेयर मूल्यमा २७ प्रतिशतसम्मको वृद्धि देखिएको र कम्पनीको मूल्यांकन करिब १४० अर्ब अमेरिकी डलर पुगेको उल्लेख छ । जियोको शेयर सूचीकरणको अवसरमा मुम्बईको चर्चित सी लिंक पुलमा विशेष बत्तीको प्रदर्शनी गरिएको थियो भने रिलायन्सले पत्रपत्रिकामा पूर्ण पृष्ठका विज्ञापन छापेर धन्यवाद ज्ञापन गरेको थियो ।
सन् २०१६ मा सेवा शुरु गरेको जियोका हाल ५२ करोड ४० लाख प्रयोगकर्ता छन् । सूचीकरणका क्रममा स्टक एक्सचेन्जबाट प्रत्यक्ष प्रसारण हुँदा मुकेश अम्बानीका कान्छा छोराले जियोको प्रशंसा गर्दै भाषण गरेका थियो । त्यो देखेर पिता मुकेश अम्बानी भावुक बनेको भिडियो अहिले सामाजिक सञ्जालमा फैलिएको छ ।
(183).png)
