.jpg)
बंगालको खाडीमा विकसित शक्तिशाली चक्रवात ‘अर्नब’को प्रभावले नेपालमा बिहीबारदेखि मौसम प्रभावित हुने भएको छ। जल तथा मौसम विज्ञान विभागको पूर्वानुमानअनुसार बिहीबार रातिदेखि वर्षा र हिमपातको सम्भावना बढ्ने तथा शुक्रबार र शनिबार केही क्षेत्रमा भारी वर्षा र हिमपात हुन सक्ने देखिएको छ।
भारतको आन्ध्र प्रदेशको तटीय क्षेत्रमा प्रवेश गर्ने क्रममा रहेको चक्रवातको अवशेष नेपालतर्फ फैलिने क्रममा पश्चिमी वायु तथा माथिल्लो वायुमण्डलमा रहेको मौसमी प्रणालीसँग अन्तरक्रिया हुँदा वर्षा गराउन सक्ने मौसमविद्हरूले बताएका छन्। चक्रवात नेपालमा सीधै प्रवेश गर्ने नभई त्यससँग सम्बन्धित मौसमी प्रणालीले नेपालमा प्रभाव पार्ने सम्भावना रहेको छ।
मौसमविद् बिभूति पोखरेलका अनुसार बंगालको खाडीबाट आउने मौसमी प्रणाली नेपाल आइपुग्दा कमजोर हुन सक्ने भए पनि यसको गति, तीव्रता र अन्य मौसमी प्रणालीसँगको अन्तरक्रियाका आधारमा वर्षाको मात्रा फरक पर्न सक्छ। त्यसैले वर्षाको सम्भावनालाई ध्यानमा राखेर आवश्यक सतर्कता अपनाउनुपर्ने देखिएको छ।
जल तथा मौसम विज्ञान विभागको पूर्वानुमानअनुसार कोशी, मधेश, बागमती, गण्डकी र लुम्बिनी प्रदेशका धेरै स्थानमा वर्षा हुन सक्नेछ। शुक्रबार र शनिबार यी प्रदेशका केही क्षेत्रमा भारी वर्षा तथा मेघगर्जन र चट्याङसहित वर्षाको सम्भावना छ। कर्णाली र सुदूरपश्चिम प्रदेशका विभिन्न स्थानमा पनि वर्षा तथा हिमपात हुन सक्ने अनुमान छ।
उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम रहने भएकाले विशेष सावधानी अपनाउनुपर्नेछ। प्रतिकूल मौसमका कारण पदयात्रा, पर्वतारोहण तथा उच्च हिमाली क्षेत्रको आवागमन प्रभावित हुन सक्नेछ। सडक यातायात र हवाई उडानमा समेत मौसमअनुसार अवरोध आउन सक्ने भएकाले यात्रा गर्नुअघि सम्बन्धित निकायबाट जानकारी लिन आवश्यक छ।
सम्भावित वर्षाले कृषि क्षेत्रमा पनि असर पार्न सक्ने देखिएको छ। धान काट्ने र भित्र्याउने समय भएकाले किसानलाई पाकेको धान तथा काटेर सुकाउन राखिएको बाली सुरक्षित राख्न आग्रह गरिएको छ। वर्षा सुरु हुनुअघि सम्भव भएसम्म कृषि उपज सुरक्षित स्थानमा भण्डारण गर्नुपर्नेछ।
सम्भावित भारी वर्षाका कारण नदी तथा खोलामा पानीको बहाव बढ्न सक्ने र पहाडी क्षेत्रमा पहिरोको जोखिम बढ्न सक्ने भएकाले जोखिमयुक्त स्थानमा बसोबास गर्ने नागरिकलाई सतर्क रहन आवश्यक छ। उच्च हिमाली क्षेत्रमा यात्रा गर्ने पर्यटक तथा पदयात्रीले मौसम अनुकूल नभएसम्म जोखिमपूर्ण यात्रा नगर्नु उपयुक्त हुनेछ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले पनि अक्टोबर २९ देखि ३१ सम्म सम्भावित प्रतिकूल मौसमलाई ध्यानमा राख्दै सतर्कता अपनाउन आग्रह गरेको छ। मौसमको अवस्था परिवर्तन हुन सक्ने भएकाले नागरिकलाई जल तथा मौसम विज्ञान विभागका पछिल्ला पूर्वानुमान र आधिकारिक सूचनालाई आधार मानेर आवश्यक तयारी गर्न सुझाव दिइएको छ।
प्रकाशित: ११ कार्तिक २०८३ ०७:०० बुधबार
