ओटीपी मागेर, बैंकको नाममा एसएमएस पठाएर वा फर्जी लिंकमार्फत ग्राहकका विवरण हात पारेर अनलाइन ठगी गर्ने क्रम बढ्दै गएको छ ।
काठमाडौँ — रुपन्देहीकी जुना ज्ञवालीलाई अपरिचित नम्बरबाट फोन आयो । फोन गर्नेले ‘केवाईसी अपडेट नगरे बैंक खाता फ्रिज हुन्छ’ भने । उनले भिडियो कल गर्न भनिन् । भिडियो कलमा बैंकको लोगो र आइडी कार्ड लगाएको व्यक्ति देखेपछि उनले विश्वास गरिन् र ओटीपी दिइन् ।
ओटीपी दिएलगत्तै उनको मोबाइल बैंकिङ एप स्क्यामरको नियन्त्रणमा पुग्यो । बैंकलाई खाता बन्द गर्न खबर गर्दासम्म उनको खाताबाट पटक–पटक गरी ४ लाख ४८ हजार रुपैयाँ अर्कै खातामा स्थानान्तरण भइसकेको थियो ।
यस्तै किसिमको ठगीमा काठमाडौंकी एक युवती पनि बैंकको नाम उल्लेख गरेर आएको एसएमएसबाट ठगीमा परिन् । राष्ट्रिय परिचयपत्र अपडेट गर्न भन्दै आएको एसएमएसमा रहेको लिंक खोलेर बैंकका विवरण भरेपछि उनको खाताबाट पैसा ट्रान्सफर भयो ।
काठमाडौं फिनटेकका संस्थापक सञ्जिव सुब्बाका अनुसार बैंकले ग्राहकसँग खाताको विवरण वा ओटीपी माग्दैन । बैंकको प्रतिनिधि भन्दै कसैले फोन गरे पनि विवरण र ओटीपी दिन नहुने उनको सुझाव छ । फेसबुक, ह्वाट्सएप, भाइबरलगायतबाट आएका लिंक क्लिक नगर्न पनि उनले आग्रह गरेका छन् ।
अनलाइन ठगीमा ‘म्युल अकाउन्ट’ अर्थात् फर्जी बैंक खाता प्रयोग हुने गरेका छन् । कमिसनको लोभमा आफ्नो बैंक खाता अरूलाई प्रयोग गर्न दिन नहुने सुब्बाको भनाइ छ ।
स्क्याममा परेको थाहा पाए तत्काल बैंकलाई खबर गरी खाता बन्द गर्नुपर्छ । त्यसपछि प्रमाणसहित प्रहरीमा उजुरी दिन सकिन्छ ।
(183).png)
