अभिनेत्री रश्मिका मन्दाना र उनका पति विजय देवरकोंडा यतिबेला सामाजिक सञ्जालमा चर्चामा छन् । दुवैले सामाजिक सञ्जालमा छुट्टाछुट्टै पोस्ट गर्दै आफ्नो सम्बन्धमाथि उठेका प्रश्न र भइरहेको ट्रोलिङको जवाफ दिएका छन् ।
यो चर्चा हालै प्रसारण भएको टेलिभिजन कार्यक्रम ‘कफी विथ करण ९’ को एउटा एपिसोडबाट सुरु भएको हो । उक्त कार्यक्रममा रश्मिका मन्दाना र विजय देवरकोंडा सँगै पुगेका थिए । कार्यक्रममा उनीहरूले आफ्नो सम्बन्ध र विवाहबारे कुराकानी गरेका थिए ।
त्यसपछि सामाजिक सञ्जालमा विजयको व्यवहार र उनीहरूको सम्बन्धलाई लिएर विभिन्न टिप्पणी हुन थाले । कतिपयले विजयलाई ‘रेड फ्ल्याग’ अर्थात् सम्बन्धमा समस्या निम्त्याउन सक्ने व्यक्तिका रूपमा चित्रण गरे भने केहीले रश्मिकालाई सम्बन्धबारे सल्लाह दिन थाले ।
यसैबीच रश्मिकाले लामो पोस्ट लेख्दै त्यस्ता टिप्पणीको जवाफ दिएकी छन् । त्यसको केही समयपछि विजयले पनि इन्स्टाग्राममा पोस्ट गर्दै आफूहरू ‘एकदम खुसी’ रहेको बताएका छन् ।
‘कफी विथ करण ९’ मा विवाहबारे कार्यक्रम सञ्चालक करण जौहर, रश्मिका र विजयबीच भएको कुराकानीपछि उनीहरूको सम्बन्धलाई लिएर सामाजिक सञ्जालमा चर्चा सुरु भएको थियो ।
रश्मिकाले विजयसँग विवाहका लागि आफूले प्रस्ताव राखेको बताएकी थिइन् । विजयले उनलाई १०० पटक सोध्न भनेका थिए । रश्मिकाका अनुसार त्यसपछि उनले करिब एक वर्षसम्म विजयलाई विवाहबारे सोधिरहिन् ।
यद्यपि, उनीहरूबीचको कुराकानी हल्का र रमाइलो वातावरणमा भएको थियो । कार्यक्रममा विजयले विवाहजस्तो ठूलो निर्णय तत्कालीन भावनाका आधारमा मात्रै लिन नचाहेको बताएका थिए ।
यो कुराकानीको एउटा अंश सामाजिक सञ्जालमा भाइरल भयो । त्यसपछि केही प्रयोगकर्ताले विजयको व्यवहारमाथि प्रश्न उठाए ।
एक प्रयोगकर्ताले विजयलाई ‘वाकिङ रेड फ्ल्याग’ भन्दै उनले संसारसामु आफ्नी पत्नीको अपमान गरेको टिप्पणी गरे । अर्का प्रयोगकर्ताले रश्मिकालाई आफूले अझ राम्रो व्यक्ति पाउन योग्य रहेको भन्दै सल्लाह दिए ।
त्यस्तै, अर्का प्रयोगकर्ताले रश्मिका विजयलाई मन पराउने तर विजय भने आफैँलाई मात्रै मन पराउने टिप्पणी गरे । केहीले उनीहरूको कुराकानीलाई अस्वाभाविक र असहज भन्दै आलोचना पनि गरे ।
विजयले विवाहका लागि आफूलाई १०० पटक सोध्न भनेको प्रसङ्गलाई लिएर पनि केहीले प्रश्न उठाए । उनीहरूले यसलाई सम्बन्धमा समानता नभएको सङ्केतका रूपमा व्याख्या गरे ।
यद्यपि, धेरैले टेलिभिजन कार्यक्रममा भएको केही मिनेटको कुराकानीका आधारमा कुनै जोडीको समग्र सम्बन्धबारे निर्णय गर्न नमिल्ने बताएका छन् । केहीले विजयको बचाउ गर्दै सामाजिक सञ्जालका प्रयोगकर्ताले कुनै व्यक्तिलाई राम्ररी नचिनी ‘टक्सिक’ वा समस्याग्रस्त व्यक्तिको संज्ञा दिइरहेको टिप्पणी गरे ।
त्यसपछि रश्मिका मन्दानाले सामाजिक सञ्जालमा लामो पोस्ट लेख्दै आफ्नो धारणा सार्वजनिक गरिन् ।
उनले सामान्यतया यस्ता विषयमा प्रतिक्रिया नदिने बताइन् । किनभने सबैलाई आफ्नो विचार राख्ने अधिकार रहेको उनको भनाइ थियो । तर, यसपटक आफू र विजयको सम्बन्धलाई लिएर भइरहेको चर्चाबारे बोल्ने निर्णय गरेको उनले उल्लेख गरिन् ।
रश्मिकाले लेखेकी छन्, ‘हामी दुवैको सामाजिक सञ्जालमा अनावश्यक राय, टिप्पणी र नमागिएका सल्लाहको बाढी आएको छ । मानिसहरू जुन विश्वासका साथ हाम्रो पछि लागिरहेका छन्, त्यसले मलाई साँच्चै केही हदसम्म विचलित बनायो । म सोचिरहेकी थिएँ, ‘यो के भइरहेको छ ?’ त्यसैले केही समय पछि हटेर सोचें र अब आफ्नो जीवनबारे सानो कुरा भन्न चाहन्छु ।
‘सबैभन्दा पहिले, यो कति पटक सोधियो वा पूरै एक वर्षसम्म सोधिरहियो भन्ने कुरा थिएन । केही मानिस यही कुरामा अल्झिएका छन् । हो, त्यस्तो कुराकानी भएको थियो । तर, हामी दुवैमध्ये कसैलाई पनि भव्य प्रस्तावको खोजी थिएन । कुरा यति मात्रै थियो कि हामी एकअर्कालाई बुझ्न पर्याप्त समय र ठाउँ दिऊँ । जीवनका राम्रा र नराम्रा परिस्थिति, खुसी र तनावका बाबजुद पनि हामी एकअर्कासँगै जीवन बिताउन चाहन्छौँ कि चाहँदैनौँ र यो सही समय हो कि होइन भन्ने निश्चित गर्न चाहन्थ्यौँ । हामीले त्यही गर्यौँ । हामीले एकअर्कालाई रोज्यौँ ।’
रश्मिकाले मानिसहरूलाई आफ्नो र विजयको सम्बन्धबारे चिन्ता गरिरहन आवश्यक नरहेको बताएकी छन् ।
उनले आफू आफ्नो पतिलाई लिएर ‘अत्यधिक प्रेममा’ रहेको पनि उल्लेख गरेकी छन् । आफ्नो जीवनसाथीप्रति यति धेरै प्रेम व्यक्त गर्नु कहिलेदेखि गलत हुन थाल्यो भन्दै उनले प्रश्न गरेकी छन् ।
उनले लेखेकी छन्, ‘यदि मैले फेरि जीवनमा त्यही निर्णय गर्नुपर्यो भने पनि म विजयलाई नै रोज्नेछु ।’
उनका अनुसार आफूले विजयलाई १०० पटक मात्रै होइन, १ हजार पटक नै विवाहबारे सोध्न तयार हुने थिइन् ।
रश्मिकाले आफ्नो चिन्ता गरेको बहानामा आफूलाई सम्बन्धबाट बाहिरिन सल्लाह दिनेहरूमाथि पनि टिप्पणी गरेकी छन् ।
कुनै महिलाको परिवार र निजी जीवनबारे नबुझी टिप्पणी गर्नु नारीवाद नभएको उनको भनाइ छ ।
उनले यसलाई ‘नारीवादको नाममा गरिने दुर्व्यवहार’ को संज्ञा दिएकी छन् ।
रश्मिकाको पोस्ट आएको केही समयपछि विजय देवरकोंडाले पनि इन्स्टाग्राममा आफ्नी पत्नीसँगका तस्बिर र भिडियो सार्वजनिक गरे ।
उनले लेखेका छन्, ‘मेरी सबैभन्दा मिल्ने साथी, मेरी पत्नी, मेरी जीवनसङ्गिनी । मेरो जीवनको सबैभन्दा सुन्दर हिस्सामध्ये एक, जसलाई रोज्ने निर्णय मैले बिल्कुल सही गरेँ । हाम्रो चिन्ता गर्नेहरूलाई भनिहालूँ, हामी दुवै अत्यन्त खुसी छौँ । म आफूलाई भाग्यमानी ठान्छु ।’
उनले थप लेखेका छन्, ‘यदि पूरै संसारको विरुद्धमा केवल म र उनी छौँ भने पनि मलाई त्यही स्वीकार छ । प्रेम र खुसीका साथ सरल जीवन जिउनुलाई उत्सवका रूपमा मनाउने सबैलाई धेरै माया ।’
