३० असोज, काठमाडौं । उपराष्ट्रपति रामसहाय प्रसाद यादव र प्रधानसेनापति अशोकराज सिग्देलबीच शिष्टाचार भेटवार्ता भएको छ ।
लैनचौरस्थित उपराष्ट्रपतिको कार्यालयमा शुक्रबार भएको भेटमा बडादशैंको शुभकामना आदानप्रदान पश्चात मुलुकको समग्र सुरक्षा अवस्था, समसामयिक राष्ट्रिय विषय लगायत विविध पक्षमा सौहार्दपूर्ण छलफल भएको सचिवालयले जनाएको छ ।
उपराष्ट्रपति यादवले मुलुकको सार्वभौमिकता, भौगोलिक अखण्डता र आन्तरिक सुरक्षा कायम राख्न नेपाली सेनाले खेल्दै आएको भूमिका र भोटेकोशी बाढीले निम्त्याएको विपत्तिमा सेनाले पुर्याएको महत्वपूर्ण योगदानको उच्च प्रशंसा गरे ।
प्रधान सेनापति सिग्देलले नेपाली सेनाले देशभर सम्हालिरहेको सुरक्षा प्रबन्ध, सीमा सुरक्षा र शान्तिसुरक्षाको वर्तमान अवस्था तथा भोटेकोशी विपत्तीमा सेनाले गरेको उद्धार कार्यबारे उपराष्ट्रपति यादवलाई जानकारी गराए ।
