२५ असोजको बाढीले चुमनुव्री–६ चुम्चेतस्थित सर्दिभिरको क्यान्टिलिभर (भिर खोपेर बनाएको पुल) र नजिकैको झोलुङ्गे पुल बगाएपछि आउजाउ ठप्प भएको थियो ।
गोरखा — चार वटा काठे पुल राखेर उत्तरी गोरखाको चुम जाने बाटो खुलाइएको छ । २५ असोजको बाढीले चुमनुव्री–६ चुम्चेतस्थित सर्दिभिरको क्यान्टिलिभर (भिर खोपेर बनाएको पुल) र नजिकैको झोलुङ्गे पुल बगाएपछि आउजाउ ठप्प भएको थियो । दुई सातादेखि अवरुद्ध पदमार्ग लोक्पास्थित सर्दिभिरमा काठेपुल निर्माण भएसँगै सञ्चालनमा आएको लोक्पाका शेराप गुरुङले बताए ।
बाटो अवरुद्ध हुँदा चुमनुव्री–६ को चुम्चेत र वडा नम्वर ७ को छेकम्पारमा उपभोग्य सामाग्री ढुवानी हुन सकेको थिएन । पिक्यू खोलामा एउटा र स्यार खोलामा तीन वटा फड्के निर्माण गरिएको उनले बताए । बाढीले बाटो बगाएपछि वैकल्पिक बाटो निर्माण गरिएको छ ।
गाउँपालिकाले विपद् व्यवस्थापन कोषबाट बजेट विनियोजन गरेर आवात जावात गर्न मिल्ने गरि फड्के र बाटो निर्माण गरेको चुमनुव्री गाउँपालिकाका अध्यक्ष निमा लामाले बताए । बाटो निर्माणमा स्थानीयवासी, विभिन्न संघ संस्थाले पनि सक्रियताका साथ सहभागी बनेका थिए । २५ असोजको बुढीगण्डकी बाढीले कटान गरेको लार्के सडकको पनि मर्मत भइरहेको छ । गोरखा सडक योजना कार्यालयले खोर्लाबेँसीको सडक खुलाएर तातोपानी हुँदै दोभानसम्म मर्मत गरेको हो ।
हरिराम उप्रेती कान्तिपुरका गोरखा संवाददाता हुन् ।
