सशस्त्र प्रहरीका सात गोताखोरसहित ११ जनाको टोली र नेपाल प्रहरी दुर्घटनास्थल आसपास नदी तथा किनारामा खोजीमा जुटेका छन्।
धनकुटा — सप्तकोशी नदीमा आइतबार भएको पानीबोट दुर्घटनामा बेपत्ता भएका तीन जनाको खोजीका लागि सशस्त्र प्रहरीका गोताखोर परिचालन गरिएको छ ।
दुर्घटनामा झापाको कन्काई नगरपालिका–४ की निता मगरका अन्दाजी सात वर्षीय छोरा शिवक मगर, सुनसरीको बराहक्षेत्र नगरपालिका–१ की २१ वर्षीया प्रमिला मगर र सोही स्थानकी २२ वर्षीया मनु राई बेपत्ता छन् । उनीहरूको खोजीका लागि सशस्त्र प्रहरीका गोताखोरसहित नेपाल प्रहरीको टोली परिचालन गरिएको हो ।
सुनसरीको चतरास्थित सशस्त्र प्रहरीको चतरा बेस र पकलीस्थित सशस्त्र प्रहरीको बाहिनीबाट परिचालित गोताखोरको टोलीले दुर्घटनास्थल आसपास खोजी तीव्र पारेको सशस्त्र प्रहरीका नायब उपरीक्षक राजेश फुयालले जानकारी दिए ।
धनकुटामा रहेको सशस्त्र प्रहरी बल नेपाल नम्बर ६ हेडक्वार्टर छिन्ताङ गुल्मका गुल्मपति सशस्त्र प्रहरी नायब उपरीक्षक फुयालका अनुसार सात जना गोताखोरसहित सशस्त्र प्रहरी निरीक्षकको कमान्डमा ११ जनाको टोली खोजी तथा उद्धारमा खटिएको छ । टोलीले दुर्घटनास्थल आसपास नदीभित्र र किनारामा बेपत्ताको खोजी गरिरहेको छ ।
धनकुटाका प्रहरी उपरीक्षक नारायण रञ्जितकारका अनुसार सशस्त्र प्रहरी र गोताखोरको टोलीसँग समन्वय गरी नेपाल प्रहरीको टोलीले पनि खोज तथा उद्धारको काम अघि बढाएको छ । चतरा र त्रिवेणी क्षेत्रमा रहेका प्रहरी टोली संयुक्त रूपमा परिचालन भएका छन् । एसपी रञ्जितकारले प्रहरीको टोली पानीबोट प्रयोग गरेर नदी र किनारामा खोजीमा जुटेको जानकारी दिए । 'हामी कोप्चेदेखि चतरासम्म खोजतलासको क्रममा छौँ । त्यहाँ गोताखोरको टोली र अरू प्रहरी टोलीले खोज तथा उद्धारलाई अघि बढाउँछ,' उनले भने ।
जिल्ला प्रहरी कार्यालय धनकुटाका एसपी रञ्जितकार र सशस्त्र प्रहरी छिन्ताङ गुल्मका गुल्मपति फुयाल घटनास्थल पुगेर आइतबार राति सदरमुकाम फर्किएका छन् । यद्यपि, त्यहाँ खटिएको नेपाल प्रहरी र सशस्त्र प्रहरीको टोलीले बेपत्ताको खोजी सोमबार बिहानैदेखि पुनः तीव्र पारेको छ ।
आइतबार दिउँसो करिब २ बजे भोजपुरको हतुवागढी गाउँपालिका–९ कोप्चेबाट यात्रु लिएर सुनसरीको चतरास्थित बराहक्षेत्र जाँदै गरेको ओबीएम कम्पनीको पानीबोट धनकुटाको साँगुरीगढी गाउँपालिका–१० त्रिवेणीस्थित सप्तकोशी नदीमा दुर्घटनामा परेको थियो । प्रहरीका अनुसार पानीबोटको ब्रेक फेल भएपछि दुर्घटना भएको हो ।
दुर्घटनामा सुनसरीको बराहक्षेत्र नगरपालिका–१ की लीला राई, पहिचान नखुलेकी अन्दाजी सात वर्षीया बालिका र अन्दाजी ५० वर्षीय अर्का एक पुरुष गरी तीन जनाको मृत्यु भएको प्रहरीले आइतबार नै पुष्टि गरेको थियो ।
प्रहरीका अनुसार दुर्घटनाका बेला पानीबोटमा चालकसहित १५ जना रहेको अनुमान छ । दुर्घटनापछि बराहक्षेत्र प्रहरी चौकीको टोलीले १२ जनाको उद्धार गरी उपचारका लागि चतरा अस्पताल पठाएको थियो । उद्धार गरिएकामध्ये तीन जनाको मृत्यु भएको हो ।
दुर्घटनामा घाइते भोजपुरको हतुवागढी गाउँपालिका–४ का ३१ वर्षीय मोहन सुनारको उपचार भइरहेको छ । उनको अवस्था सामान्य रहेको प्रहरीले जनाएको छ ।
पानीबोटका चालक सुनसरीको बराहक्षेत्र नगरपालिका–१ का २४ वर्षीय सुमन मगर प्रहरीको नियन्त्रणमा छन् । चालक मगरसहित अन्य नौ जना सकुशल रहेको प्रहरीले जनाएको छ ।
विनोद घिमिरे कान्तिपुर संवाददाता हुन्।
