भोजपुरबाट चतरा जाँदै गरेको मोटरबोट बराहक्षेत्रको त्रिवेणी क्षेत्रमा एक्कासी इन्जिन बन्द भएर दुर्घटनामा परेको हो ।
धनकुटा — सप्तकोशी नदीमा मोटरबोटको इन्जिन फेल भएर दुर्घटना हुँदा ३ जनाको मृत्यु भएको छ । भोजपुरबाट चतरा जाँदै गरेको मोटरबोट बराहक्षेत्रको त्रिवेणी क्षेत्रमा दुर्घटनामा परेको हो ।
जिल्ला प्रहरी कार्यालय धनकुटाका प्रहरी उपरीक्षक नारायण रन्जितकारका अनुसार दुर्घटनामा परेका १० जनाको उद्धार गरिएको छ । उद्धार गरिएकामध्ये ५ जना घर फर्किएका छन् भने एक जनाको उपचार भइरहेको छ । दुर्घटनामा एक बालिका, एक पुरुष र एक महिलाको मृत्यु भएको पुष्टि भएको उनले बताए।
मृतकको पहिचान खुल्न बाँकी रहेको रन्जितकारले जानकारी दिए । मोटरबोटका चालकलाई बराहक्षेत्र प्रहरीले नियन्त्रणमा लिएको छ ।
विनोद घिमिरे कान्तिपुर संवाददाता हुन्।
