नारायणी किनारमा बढ्न थाल्यो चहलपहल [तस्बिरहरू]

बाढीले नारायणगढतर्फको नदी किनार क्षतविक्षत पारे पनि हिजोआज साँझपख घुम्न आउने आन्तरिक पर्यटकको चहलपहल बढ्न थालेको छ ।

चितवन — नारायणगढको नारायणी नदी किनारमा दिन ढल्दै गर्दा चहलपहल बढ्न सुरु हुन्छ । यसपटक असोज ११ मा आएको ठूलो बाढीले नारायणगढतर्फको नदी किनारलाई नराम्ररी क्षतविक्षत पारेको छ । तर पनि घुम्न आउनेको चहलपहल त्यहाँ देखिन्छ । पारि गैंडाकोटतर्फ बालुवा पहिलेको भन्दा धेरै थुप्रिएका कारण त्यतातर्फ बरु आकर्षक किनार तयार भएको छ ।

शनिबार साँझपख घाम डुब्दै गर्दा उत्तरतर्फ हिमाल टल्केको देखिन्थ्यो । गैंडाकोटतर्फको किनारमा यसपटक चहलपहल अत्यधिक छ । नदीमा मोटरबोटहरू कुदिरहेका थिए । घाम डुब्दै गर्दा नारायणगढ पुलमा बसेर फोटो–भिडियो बनाउनेहरू पनि भेटिएका थिए । नगर वनलाई देब्रे पारेर डुबेको घामको दृश्य मनमोहक थियो । साना–ठूला चराहरू पनि गुँडमा फर्कँदै थिए ।

तस्बिरहरू : रमेशकुमार पौडेल/कान्तिपुर

रमेशकुमार पौडेल कान्तिपुरका चितवन संवाददाता हुन् । उनी दुई दशकदेखि पत्रकारिता गरिरहेका छन् ।