अभियानको उद्घाटन गर्दै शनिबार दाहालले संविधान र लोकतन्त्रको रक्षा गर्न, महँगी, भ्रष्टाचार, बेथिति र दण्डहीनताविरुद्ध आवाज उठाउन तथा निरंकुशता र अराजकताको विरोध गर्न आह्वान गरेका हुन् ।
काठमाडौँ — नेपाली कम्युनिस्ट पार्टीका संयोजक पुष्पकमल दाहालले राष्ट्रिय जागरण अभियानमा सक्रिय सहभागिता जनाउन आमनागरिकलाई अपिल गरेका छन् । अभियानको उद्घाटन गर्दै शनिबार दाहालले संविधान र लोकतन्त्रको रक्षा गर्न, महँगी, भ्रष्टाचार, बेथिति र दण्डहीनताविरुद्ध आवाज उठाउन तथा निरंकुशता र अराजकताको विरोध गर्न आह्वान गरेका हुन् ।
‘नेपाली कम्युनिस्ट पार्टीका तर्फबाट यो अपिल जारी गरिरहँदा हाम्रो देश जटिल राजनीतिक, आर्थिक तथा सामाजिक संकटबाट गुज्रिरहेको छ । ठूलो आशा र अपेक्षाका साथ गठन भएको दुई तिहाइको सरकारबाट जनताले अपेक्षाअनुरूप परिणाम प्राप्त गर्न नसक्दा निराशा, असन्तुष्टि र अन्योल बढिरहेको छ,’ उनले भने, ‘महँगीले जनजीवन कष्टकर बनेको छ, बेरोजगारी र युवा पलायन बढिरहेको छ । किसान, मजदुर, उद्यमी र व्यवसायीले अनेकौं कठिनाइ भोगिरहेका छन् । जनजीविकाका आधारभूत प्रश्न झन् जटिल बन्दै गएका छन् ।’
विगतका कामको इमानदारीपूर्वक समीक्षा गरी आफ्ना गल्ती र कमजोरीप्रति आत्मालोचित हुँदै जनताको विश्वास र भरोसा बलियो बनाउनु आफ्नो दायित्व रहेको पनि उनले बताए ।
दाहालले अभियानमार्फत जनताले भोगेका समस्या स्थानीय, प्रदेश र संघीय तहका सम्बन्धित निकायसमक्ष पुर्याएर समाधानका लागि निरन्तर पहल गरिने बताए । जनताबाट प्राप्त गुनासाको अभिलेख राख्ने र समाधानका लागि भएका प्रयासको प्रगतिबारे जानकारी दिने पनि उनले बताए ।
नेपाली कम्युनिस्ट पार्टीले कात्तिक ७ देखि मंसिर २५ सम्म राष्ट्रिय जागरण अभियान सञ्चालन गर्ने निर्णय गरेको छ । उद्घाटन समारोहमा पार्टीका सहसंयोजक माधवकुमार नेपाल, नेता नारायणकाजी श्रेष्ठलगायत नेता तथा कार्यकर्ताको उपस्थिति थियो ।
नेपाल नेपाल न्यूज बैंक न्युज एजेन्सी हो ।
.jpg)
