स्थानीयमा त्रास फैलाएपछि प्राविधिक टोलीले डार्ट गरी चितुवा नियन्त्रणमा लियो र प्राकृतिक बासस्थानमा छोड्यो।
बर्दिया — घरमा पसेको चितुवालाई नियन्त्रणमा लिइएको छ । ठाकुरबाबा नगरपालिका–९ खुसलपटुवा चोकस्थित ओमप्रकाश भट्टराईको घरमा पसेको चितुवालाई शनिबार राति साढे ८ बजे नियन्त्रणमा लिइएको हो ।
भट्टराईको घरमा शनिबार साँझ चितुवा पसेको थियो । घरमा चितुवा पस्दा स्थानीय सर्वसाधारण त्रसित बनेका थिए ।
घरमा पसेको चितुवालाई डार्ट गरी नियन्त्रणमा लिइएको राष्ट्रिय प्रकृति संरक्षण कोषका प्रमुख अजित तुम्वाहाम्फेले बताए ।
अन्दाजी ५/६ वर्षको पोथी चितुवालाई नियन्त्रणमा लिई प्राकृतिक बासस्थानमा छोडिएको बर्दिया राष्ट्रिय निकुञ्जका सूचना अधिकारी अरविन्द्र यादवले बताए ।
बर्दिया राष्ट्रिय निकुञ्ज र राष्ट्रिय प्रकृति संरक्षण कोषको प्राविधिक टोली, नेपाली सेना तथा स्थानीयको सहयोगमा चितुवालाई नियन्त्रणमा लिइएको थियो ।
रामप्रसाद रामप्रसाद कान्तिपुरका बर्दिया संवाददाता हुन् । उनी समसामयिक विषयमा रिपाेर्टिङ गर्छन् ।