कीर्तिपुरमा दीपेन्द्रसिंह ऐरीको टोलीले पहिले बलिङ रोज्दै लुम्बिनीविरुद्ध फाइनलमा दबाब सिर्जना गर्ने रणनीति अपनाएको छ।
काठमाडौँ — सुदूरपश्चिम रोयल्सले नेपाल प्रिमियर लिग (एनपीएल) क्रिकेटको तेस्रो सिजनको फाइनलमा पहिले फिल्डिङ गर्ने भएको छ । दीपेन्द्रसिंह ऐरीको कप्तानीमा रहेको सुदूरपश्चिमले त्रिवि अन्तर्राष्ट्रिय क्रिकेट रंगशाला, कीर्तिपुरमा टस जितेर लुम्बिनी लायन्सलाई ब्याटिङको निम्तो दिएको हो ।
सुदूरपश्चिम लगातार तेस्रो सिजन एनपीएलको फाइनल खेल्दै छ । चितवन राइनोजविरुद्ध बिहीबार क्वालिफायर २ खेलेको टोलीबाट सुदूरपश्चिमले फाइनल खेल्ने टोलीमा एक खेलाडी परिवर्तन गरेको छ । वेस्ट इन्डिजका अलराउन्डर फाबियन एलेनको स्थानमा इंग्लिस खेलाडी सैफ जैबलाई खेलाएको छ ।
यी दुई टोली यस सिजनको प्रतियोगितामा तेस्रो पटक खेलिरहेका छन् । रोहित पौडेलको नेतृत्वमा रहेको लुम्बिनीले लिग चरण र क्वालिफायर १ मा सुदूरपश्चिमलाई कुनै मौका दिएको थिएन । सुदूरपश्चिमविरुद्ध क्वालिफायर १ खेलेको टोलीबाट लुम्बिनीले आफ्नो टोलीमा कुनै खेलाडी परिवर्तन गरेको छैन ।
लुम्बिनी उपाधि रक्षा गर्ने अभियानमा हुनेछ भने सुदूरपश्चिम पहिलो पटक उपाधि जित्ने दाउमा रहेको छ । गत वर्ष लुम्बिनीले सुदूरपश्चिमलाई नै एकतर्फी फाइनलमा पराजित गरेको थियो ।
विनोद पाण्डे कान्तिपुरका खेलकुद ब्यूरो प्रमुख हुन् ।