एमाले अध्यक्ष केपी शर्मा ओलीले स्थानीय निर्वाचनका लागि तयारीमा रहन भन्दै कहीँकतै विगतमा कमजोरी भएका रहेछन् भने हतारहतार मिलाउन निर्देशन दिए ।
काठमाडौँ — एमाले अध्यक्ष केपी शर्मा ओलीले पालिका प्रमुख र उपप्रमुखहरुलाई आगामी स्थानीय निर्वाचनका लागि तयारीमा रहन निर्देशन दिएका छन् । पालिका जनप्रतिनिधिले जनताको सेवा गर्न सक्ने भन्दै उनले मुस्कानसहित सेवा दिन निर्देशन दिए ।
‘तपाईहरुले मुस्कानसहित व्यवहार गरिदिनुभएन भने मान्छे रिसाउँछ,’ उनले भने, ‘मान्छे खुसी हुने, पक्षमा आउने, विपक्षमा जाने त्यही हो ।’ उनले पालिकमा काम गर्दा कमजोरी भएको भए तत्काल सच्याउन पनि निर्देशन दिए ।
‘स्थानीय निर्वाचन संघर्षको थलो हो । लडाइँ त्यहीँ हुन्छ,’ काठमाडौंमा भएको एमालेबाट निर्वाचित पालिका प्रमुख र उप्रमुखको भेलामा उनले भने, ‘कहीँकतै विगतमा कमजोरी भएका रहेछन् भने हतारहतार मिलाउनुस् । कतै काम गर्दा पोखिएको छ भने उठाउनुस् ।'