४ मंसिर, काठमाडौं । आज कात्तिक शुक्ल एकादशी अर्थात् हरिबोधिनी एकादशी पर्व मनाइँदैछ ।
ठूलो एकादशी पनि भनिने आजको दिन तुलसीसँग भगवान् दामोदर अर्थात् विष्णुको विवाह र विशेष पूजा गरी मनाउने परम्परा छ ।
एकादशीको अवसरमा काठमाडौंको उत्तरमा रहेको बूढानीलकण्ठस्थित नारायणस्थानमा भक्तजनको ठूलो भिड लागेको छ ।
हरिबोधिनी एकादशीको अवसरमा काठमाडौं उपत्यकाका चाँगुनारायण, शेषनारायण, इचङ्गुनारायण र विशङ्खुनारायण मन्दिरमा बिहानैदेखि भक्तजनको भिड लागेको छ ।
यी चार नारायण जान नसक्नेले बूढानीलकण्ठस्थित नारायणस्थानको दर्शन गर्दा चार नारायणको दर्शन र पूजा गरे बराबरको फल पाइने विश्वास गरिन्छ ।