Trending
Prev Story
Next Story

अमेरिकामा हवाई सेवा अझै अस्तव्यस्त, आइतबार मात्रै १० हजार बढी उडान प्रभावित

Onlinekhabar •
November 16, 2026 • 01:30 AM
3
3 reads 0 reactions

३० कात्तिक, काठमाडौं । अमेरिकामा शुक्रबार देशभरका विमानको उडान रोक्नुपरेको प्राविधिक समस्याको असर तेस्रो दिनसम्म पनि कायम रहेको छ । आइतबार मात्रै १० हजारभन्दा बढी उडान रद्द तथा ढिलाइ हुँदा हजारौँ यात्रु प्रभावित भएका छन् …

अमेरिकामा हवाई सेवा अझै अस्तव्यस्त, आइतबार मात्रै १० हजार बढी उडान प्रभावित

३० कात्तिक, काठमाडौं । अमेरिकामा शुक्रबार देशभरका विमानको उडान रोक्नुपरेको प्राविधिक समस्याको असर तेस्रो दिनसम्म पनि कायम रहेको छ । आइतबार मात्रै १० हजारभन्दा बढी उडान रद्द तथा ढिलाइ हुँदा हजारौँ यात्रु प्रभावित भएका छन् ।

उड्डयनसम्बन्धी तथ्याङ्क उपलब्ध गराउने वेबसाइट फ्लाइटअवेयरका अनुसार आइतबार अमेरिकाभर २ हजार ३०० भन्दा बढी उडान रद्द भएका छन् भने करिब ७ हजार ७०० उडान ढिलाइ भएका छन् । शनिबार पनि ६ हजार ४०० भन्दा बढी उडान रद्द र ८ हजारभन्दा बढी उडान ढिलाइ भएका थिए ।

अमेरिकी यातायातमन्त्री सिन डफीले सोमबारसम्म हवाई सेवा सामान्य अवस्थामा फर्किने अपेक्षा गरेका छन् । तर विमान र चालक दल (क्रु) निर्धारित स्थानमा नरहेकाले सेवा नियमित हुन केही समय लाग्ने उनको भनाइ छ ।

बीबीसीको अमेरिकी साझेदार सीबीएससँग कुरा गर्दै डफीले भनेका छन्, ‘हाम्रा विमान र चालक दल निर्धारित स्थानमा छैनन् । त्यसैले सबै कुरा सामान्य अवस्थामा फर्काउन केही समय लाग्छ ।’

शुक्रबार अमेरिकाको संघीय उड्डयन प्रशासन (एफएए) ले प्राविधिक समस्या देखिएपछि देशभरका विमानस्थलबाट हुने उडानमा रोक लगाएको थियो । करिब पाँच घण्टासम्म कायम रहेको उक्त रोकले अमेरिकी हवाई यातायात प्रणालीमा ठूलो अवरोध सिर्जना गरेको थियो ।

अमेरिकी अधिकारीहरूका अनुसार एयर ट्राफिक कन्ट्रोल (एटीसी) प्रणालीमा प्रयोग हुने सञ्चार नेटवर्कमा समस्या आएपछि देशभरका उडान रोक्नुपरेको थियो ।

पुराना तामाका तार (कपर वायर) लाई फाइबर अप्टिक प्रविधिमा रूपान्तरण गर्ने क्रममा नयाँ राउटर जडान गरिएको थियो । अर्कान्सास राज्यको एल डोराडोस्थित एफएएको एक केन्द्रमा जडान गरिएको राउटरबाट असामान्य रूपमा ठूलो संख्यामा डाटा प्रवाह हुन थालेपछि सञ्चार नेटवर्क प्रभावित भएको प्रारम्भिक अनुसन्धानले देखाएको छ ।

यातायातमन्त्री डफीका अनुसार उक्त राउटरले प्रत्येक चारदेखि पाँच सेकेन्डमा एक हजारभन्दा बढी कनेक्सन प्रयास गरिरहेको थियो । त्यसले एयर ट्राफिक कन्ट्रोल केन्द्रहरूमा सञ्चार तथा राडार प्रणालीमा समस्या उत्पन्न गर्‍यो ।

समस्या फैलिँदै गएपछि विमान चालक र एयर ट्राफिक कन्ट्रोलरबीचको सञ्चार प्रभावित हुने अवस्था आएको थियो । यात्रुको सुरक्षालाई ध्यानमा राख्दै एफएएले देशभरका विमानस्थलबाट हुने उडान रोक्ने निर्णय गरेको थियो ।

एफएएका अनुसार टेक्सासको अमारिलो र अर्कान्सासको एल डोराडोस्थित उपकरणबाट नेटवर्कमा समस्या फैलिएको प्रारम्भिक अनुसन्धानले देखाएको छ । समस्या उत्पन्न गराउने राउटरको प्रसारण क्षमता बन्द गरिएको छ । साथै, त्यस्तै प्रकृतिका अन्य करिब ६० वटा राउटरमा पनि सावधानीस्वरूप उक्त सुविधा बन्द गरिएको छ ।

तर प्राविधिक खराबीको वास्तविक कारण र त्यसमा उपकरणको त्रुटि वा जडान गर्ने ठेकेदार कम्पनीको कमजोरीमध्ये कुन जिम्मेवार थियो भन्ने अझै स्पष्ट भइसकेको छैन ।

अमेरिकी अधिकारीहरूले प्रारम्भिक अनुसन्धानमा साइबर आक्रमण वा बाह्य हस्तक्षेपको कुनै प्रमाण फेला नपरेको बताएका छन् ।

यातायातमन्त्री डफीले पनि यो घटना साइबर आक्रमणका कारण भएको प्रमाण नभेटिएको बताएका छन् । एफएए र त्यसको नेटवर्क सेवा प्रदायक कम्पनी एलथ्रीह्यारिसले घटनाको विस्तृत अनुसन्धान गरिरहेका छन् ।

शुक्रबार उडान रोक्ने निर्णय हुँदा अमेरिकी आकाशमा ३ हजार ५०० भन्दा बढी विमान उडिरहेका थिए । ती सबै विमानलाई सुरक्षित रूपमा अवतरण गराइएको अमेरिकी अधिकारीहरूले बताएका छन् ।

उडान रोकिएको समयमा केही विमानलाई अन्य विमानस्थलतर्फ मोडिएको थियो भने केहीले गन्तव्यसम्मको यात्रा पूरा गरेका थिए । विमानस्थलमा रहेका यात्रु भने घण्टौँसम्म अलपत्र परेका थिए । कतिपय यात्रु विमानभित्रै रोकिएका थिए भने कतिपयले विमानस्थलमै रात बिताउनुपरेको थियो ।

यसको असर अमेरिका बाहिरका उडानमा समेत परेको थियो । युरोप र बेलायतबाट अमेरिकातर्फ आउने तथा अमेरिकाबाट बाहिरिने केही अन्तर्राष्ट्रिय उडानसमेत रद्द भएका थिए ।

हवाई प्रणाली आधुनिकीकरण गर्न ५० अर्ब डलर माग

अमेरिकी राष्ट्रपति डोनाल्ड ट्रम्पले हवाई यातायात नियन्त्रण प्रणालीको आधुनिकीकरणका लागि कंग्रेसलाई थप बजेट स्वीकृत गर्न आग्रह गरेका छन् ।

ट्रम्पले आइतबार सामाजिक सञ्जाल ट्रुथ सोसलमार्फत अहिले प्रयोग भइरहेको हवाई नियन्त्रण प्रणालीका धेरै उपकरण ५० वर्ष पुराना रहेको उल्लेख गर्दै एकैपटक आधुनिकीकरण गर्नुपर्ने बताएका छन् ।

यातायातमन्त्री डफीले पनि एटीसी प्रणालीको पूर्ण स्तरोन्नतिका लागि ५० अर्ब डलर आवश्यक पर्ने बताएका छन् । यसअघि उनले ३० अर्ब डलरको माग गरेका थिए ।

सन् २०२५ मा कंग्रेसले हवाई यातायात नियन्त्रण प्रणालीको सुधारका लागि १२ अर्ब ५० करोड डलर स्वीकृत गरेको थियो । तर त्यस रकममध्ये करिब ११ अर्ब डलर अझै खर्च हुन बाँकी रहेको भन्दै विपक्षी डेमोक्रेटिक सांसदहरूले थप बजेट माग्नुको औचित्यमाथि प्रश्न उठाएका छन् ।

डफीले भने यसअघि स्वीकृत रकम निश्चित पूर्वाधार सुधारका लागि मात्र छुट्याइएको र हवाई क्षेत्र व्यवस्थापन गर्ने नयाँ सफ्टवेयर निर्माणका लागि पर्याप्त बजेट नभएको बताएका छन् ।

अमेरिकी उड्डयन प्रणालीमा पुरानो प्रविधि, उपकरणको समस्या र एयर ट्राफिक कन्ट्रोलरको अभाव लामो समयदेखि चुनौतीका रूपमा रहँदै आएको छ । पछिल्लो घटनाले त्यसको कमजोरी पुनः उजागर गरेको विज्ञहरूको भनाइ छ ।

Prev Swipe Story Next

Same Story from Other Publications

Compare how 5 other independent news outlets reported on this story.

5 Publications
Hamro Patro News
5h ago
अमेरिकामा हवाई उडान अझै प्रभावित, दुई दिनमा हजारौँ उडान रद्द र ढिलाइ

अमेरिकामा हवाई उडान अझै प्रभावित, दुई दिनमा हजारौँ उडान रद्द र ढिलाइ

काठमाडौं : अमेरिकामा हवाई यातायात प्रणालीमा आएको प्राविधिक समस्याका कारण दुई दिन बितिसक्दा पनि हजारौँ उडान प्रभावित भएका छन् । आइतबार मात्रै अमेरिकाभर ५ हजारभन्दा बढी उडान ढिलाइ भएका छन् भने २ हजार...

#उडान #अमेरिका #हवाई
Compare →
Nagarik News
19h ago
प्राविधिक समस्या हुँदा अमेरिकाको हवाई सेवा अस्तव्यस्त, १७ हजार उडान रद्द

प्राविधिक समस्या हुँदा अमेरिकाको हवाई सेवा अस्तव्यस्त, १७ हजार उडान रद्द

अमेरिकामा प्राविधिक समस्याका कारण शुक्रबार राष्ट्रव्यापी रूपमा हवाई उडान रोकिएपछि हजारौँ यात्रु प्रभावित भएका छन्।

#उडान #अमेरिका #हवाई
Compare →
Ekantipur
20h ago
अमेरिकामा हवाई प्रणाली सामान्य अवस्थामा फर्कन कम्तीमा आइतबार रातिसम्म प्रतिक्षा गर्नुपर्ने

अमेरिकामा हवाई प्रणाली सामान्य अवस्थामा फर्कन कम्तीमा आइतबार रातिसम्म प्रतिक्षा गर्नुपर्ने

हवाई उडानसम्बन्धी तथ्याङ्क राख्ने वेबसाइट फ्लाइटअवेयरका अनुसार शनिबार रातिसम्म अमेरिकामा ६ हजार ४ सयभन्दा बढी उडान रद्द भएका छन्

#उडान #अमेरिका #हवाई
Compare →
Bizshala
1d ago
अमेरिकामा ५ हजार ३०० उडान रद्द हुँदा हजारौँ यात्रु अलपत्र

अमेरिकामा ५ हजार ३०० उडान रद्द हुँदा हजारौँ यात्रु अलपत्र

काठमाण्डौ । हवाई यातायात नियन्त्रण केन्द्रहरूको सञ्चार प्रणालीमा समस्या आएपछि अमेरिकाले शुक्रबार देशभरका विमानस्थलबाट उडान भर्न रोक लगायो। चार घण्टाभन्दा बढी समयपछि रोक हट्यो र सीमित उडान सुरु भए। तर हजारौँ उडान रद्द वा ढिला हुँदा नयाँ टिकट र वैकल्पिक उडान खोजिरहेका हजारौँ यात्रु विमानस्थलमै अड्किए।

#उडान #अमेरिका
Compare →
Arthasansar
1d ago
अमेरिकाको हवाई सेवा अस्तव्यस्त, देशभरका २२ ट्राफिक कन्ट्रोल सेन्टरमा सञ्चार समस्या

अमेरिकाको हवाई सेवा अस्तव्यस्त, देशभरका २२ ट्राफिक कन्ट्रोल सेन्टरमा सञ्चार समस्या

अमेरिकाभरका विमानस्थलबाट हुने उडान चार घण्टाभन्दा बढी समय रोकिएपछि पुनः सञ्चालनमा आएका छन्। हवाई ट्राफिक नियन्त्रण केन्द्रहरूमा देखिएको सञ्चार प्रणालीको...

#उडान #अमेरिका #हवाई
Compare →

Related Stories

World News
Build #2612