बंगलादेशको गोपालगञ्जमा अवामी लिगका नेता, कार्यकर्ता तथा समर्थकले विरोध प्रदर्शन गरेका छन् । बंगलादेश सरकारले उक्त पार्टीका गतिविधिमाथि प्रतिबन्ध लगाएको छ ।
स्थानीय पत्रकारका अनुसार दिनभर चलेको प्रदर्शनमा सहभागी कतिपयले धारिलो हतियार र लाठी बोकेका थिए ।
बीबीसी बंगलाका अनुसार प्रदर्शनकारीले जिल्ला अवामी लिगको कार्यालय कब्जा गरेका छन् । उनीहरूले सहरको लन्चघाट क्षेत्रमा रहेको जुलाई स्मारकमा समेत आगजनी गरेका छन् ।
प्रदर्शनका क्रममा प्रहरीको एउटा गाडीसमेत जलाइएको समाचारमा उल्लेख छ ।
प्रदर्शनकारीले गोपालगञ्ज सरकारी कलेजको नामपाटी हटाएर त्यसको स्थानमा ‘सरकारी बंगबन्धु कलेज’ लेखिएको ब्यानर राखेका थिए ।
सन् २०२४ को विद्यार्थी आन्दोलनपछि अवामी लिग नेतृत्वको शेख हसिनाको सरकार ढलेको थियो । त्यसपछि उक्त कलेजको नाम परिवर्तन गरी गोपालगञ्ज सरकारी कलेज राखिएको थियो ।
त्यस्तै, गोपालगञ्ज विज्ञान तथा प्रविधि विश्वविद्यालयको हादी चत्तरमा राखिएको नामपाटीसमेत तोडफोड गरिएको छ ।
सामाजिक सञ्जालमा सार्वजनिक भएका प्रदर्शनका भिडियोमा सहरमा प्रहरीको उपस्थिति देखिन्छ । प्रदर्शनकारीले प्रहरीको निगरानीमा ¥याली निकाल्नुका साथै सडक अवरुद्ध गरेका थिए ।
जिल्ला प्रहरीले भने घटनाबारे टिप्पणी गर्न अस्वीकार गरेको छ ।
