पोखरा एजेन्सर्जले नेपाल प्रिमियर लिग (एनपीएल) तेस्रो सिजनको अन्तिम लिग खेलमा काठमान्डु गोर्खाजसामु ठूलो लक्ष्य प्रस्तुत गरेको छ ।
काठमाडौँ — काठमाडौं– पोखरा एजेन्सर्जले नेपाल प्रिमियर लिग (एनपीएल) तेस्रो सिजनको अन्तिम लिग खेलमा काठमान्डु गोर्खाजसामु ठूलो लक्ष्य प्रस्तुत गरेको छ ।
टस जितेर पहिले ब्याटिङका लागि ओर्लेको पोखराले २० ओभरमा ३ विकेट मात्र गुमाएर २ सय २४ रन बनाएको छ । प्रतियोगिताको इतिहासमै यो कुनै पनि टिमले खडा गरेको सबैभन्दा ठूलो स्कोर हो ।
यसअघि दोस्रो सिजन विराटनगर किंग्सले पोखराविरुद्ध नै ६ विकेटमा २ सय २० रन बनाएको थियो । यसपल्ट कुशल भुर्तेल शतक बनाउनबाट एक रनले मात्र चुके ।
उनी ९९ रनमा करण केसीकाे बलमा विकेट पछाडि समातिए । कुशलले ५१ बलमा आठ चौका र आठ छक्का प्रहार गरे । प्रतियोगितामा नेपाली ब्याटरको यो सर्वाधिक ठूलो व्यक्तिगत स्कोर हो । उनी पहिलो शतक बनाउने नेपाली खेलाडी हुनबाट चुके ।
यसअघि लुम्बिनी लायन्सका रोहित पौडेलले पहिलो सिजन ९५ रन बनाएका थिए । कुशलले ओपनर युवराज सामरासँग मिलेर दोस्रो विकेटका लागि १ सय ८६ रनको साझेदारी गरे । युवराज पनि ८९ रन बनाएर आउट भए । उनले भने ५५ बलमा आठ चौका र पाँच छक्का प्रहार गरे । धनन्जय लक्षण २ र चामिका करुणारत्ने १९ रन अविजित रहे । काठमान्डुबाट करणले दुई र जहान्दाद खानले १ विकेट लिएका थिए ।
