कार्यक्रममा १५ देशका वैज्ञानिक, वनस्पतिविद्, अनुसन्धानकर्ता, प्राध्यापक, संरक्षणकर्मी तथा सुनाखरी व्यवसायीहरूको सहभागिता हुने आयोजकले बताएको छ ।
काठमाडौँ — सुनाखरीको जैविक विविधतालाई राष्ट्रिय तथा अन्तर्राष्ट्रिय स्तरमा परिचित गराउन काठमाडौंमा पाँचौं अन्तर्राष्ट्रिय सुनाखरी गोष्ठी हुने भएको छ । मंसिर २ देखि ४ गतेसम्म हुने यो गोष्ठीमा सुनाखरीको संरक्षण, वैज्ञानिक अनुसन्धान तथा व्यावसायिक प्रवर्द्धनका विषयमा छलफल हुनेछ ।
अन्तर्राष्ट्रिय बागवानी विज्ञान समाज, अन्नपूर्ण रिसर्च सेन्टर र त्रिभुवन विश्वविद्यालयको केन्द्रीय वनस्पतिशास्त्र विभागको आयोजनामा हुने यो कार्यक्रममा नेपालकै पहिलो सुनाखरी प्रदर्शनी तथा विशेष कला कार्यशालासमेत हुँदै छ । कार्यक्रममा १५ देशका वैज्ञानिक, वनस्पतिविद्, अनुसन्धानकर्ता, प्राध्यापक, संरक्षणकर्मी तथा सुनाखरी व्यवसायीहरूको सहभागिता हुने आयोजकले बताएको छ ।
गोष्ठीमा प्रख्यात सुनाखरी वैज्ञानिक प्रोफेसर डा. याओ-चिएन एलेक्स चाङ मुख्य वक्ताका रूपमा सहभागी हुँदै छन् । गोष्ठीमा सुनाखरीको जैविक विविधता, वर्गीकरण, आनुवंशिक अध्ययन, पारिस्थितिकी, प्राकृतिक वासस्थान संरक्षण, जलवायु परिवर्तनको प्रभाव, आधुनिक प्रविधि तथा व्यावसायिक उत्पादनका सम्भावनाबारे वैज्ञानिक छलफल र अनुसन्धानका निष्कर्ष प्रस्तुत गरिनेछन् ।
नेपाल सुनाखरीको जैविक विविधताका दृष्टिले महत्त्वपूर्ण देश हो । नेपालमा ५०० भन्दा बढी प्रजातिका सुनाखरी पाइन्छन् । कार्यक्रममा सुनाखरी प्रदर्शनीका अलावा सुनाखरी कला कार्यशालासमेत हुनेछ । जसमा ४० जना वरिष्ठ कलाकारहरूले सुनाखरीका फूलहरूलाई प्रत्यक्ष अवलोकन गरी स्थलमै चित्रकला सिर्जना गर्नेछन् ।
