जिल्ला प्रहरी परिसर, काठमाडौंका एसएसपी दिलिप घिमिरेले महेश श्रेष्ठलाई कीर्तिपुरबाट पक्राउ गरिएको पुष्टि गरे ।
काठमाडौँ — प्रहरीले नेपाली कांग्रेसका नेता उमेश श्रेष्ठका भाइ महेश श्रेष्ठलाई पक्राउ गरेको छ ।
जिल्ला प्रहरी परिसर, काठमाडौंका एसएसपी दिलिप घिमिरेले श्रेष्ठलाई कीर्तिपुरबाट पक्राउ गरिएको पुष्टि गरे । उनले कान्तिपुरसँग भने, ‘अनुसन्धानका क्रममा थप सोधपुछ गर्नुपर्ने देखिएपछि ल्याएका हौं ।’
प्रहरीका अनुसार, सम्पत्ति शुद्धीकरण र बैंकिङ कसुरको आरोपमा अनुसन्धानको दायरामा रहेको इनम सापकोटासँग जोडिएको छानिबनका क्रममा श्रेष्ठको संलग्नता देखिएको हो । ‘सापकोटाबारे अनुसन्धान गरिरहेका बेला उनको संलग्नता खुलेको थियो, त्यसपछि अनुसन्धान भइरहेको हो,’ अनुसन्धानमा संलग्न अर्का एक अधिकृतले भने, ‘लेनदेनसँग सम्बन्धित विषयहरु देखिएपछि छानबिन भएको हो ।’
प्रहरीलाई सम्पत्ति शुद्धीकरणको कसुरमा अनुसन्धानका लागि ९० दिनसम्म हिरासतमा राख्न पाउने अवस्था छ । ‘त्यो अवधिमा विभिन्न कोणबाट छानबिन गर्नेछौं,’ उनले भने । पूर्वप्रधानन्यायाधीश चोलेन्द्र शमशेर जबरालाई सुरक्षा चुनौती भएको भन्दै प्रहरी कार्यालयमा ल्याएर मोबाइल जाँच गरेपछि यो विषयको सुरुवात् भएको थियो ।
त्यसक्रममा सापकोटासमेत जोडिएपछि उनलाई पक्राउ गरेर अनुसन्धान अघि बढेको थियो । छानबिनका क्रममा सापकोटाको नेपाल प्रहरी, सशस्त्र प्रहरी, न्यायालय र राजनीतिक क्षेत्रका उच्च अधिकारीहरु कुराकानी गर्ने गरेको देखिएको थियो । उनीसँग सम्पर्क भएकै विषयलाई देखाउँदै सरकारले सशस्त्र प्रहरीका एआईजी वंशीराज दाहाललाई समेत बर्खास्त गरेको थियो ।
