दोलखा सदरमुकाम चरिकोटमा शनिबार देउवा पक्षको १५ जिल्ला अधिवेशनलाई सम्बोधन गर्दै कोइरालाले कांग्रेसलाई एकताबद्ध बनाउनु नै आफ्नो मुख्य लक्ष्य भएको बताए ।
दोलखा — शेरबहादुर देउवा नेतृत्वको समूहका १५औं नियमित महाधिवेशन तयारी समितिका संयोजक शशांक कोइरालाले नेपाली कांग्रेसको एकताबाट मात्रै लोकतन्त्र र राष्ट्रिय स्वाभिमानको रक्षा सम्भव हुने बताएका छन् ।
दोलखा सदरमुकाम चरिकोटमा शनिबार देउवा पक्षको १५ जिल्ला अधिवेशनलाई सम्बोधन गर्दै कोइरालाले कांग्रेसलाई एकताबद्ध बनाउनु नै आफ्नो मुख्य लक्ष्य भएको बताए । 'कांग्रेसको एकताले लोकतन्त्र, राष्ट्रिय स्वाभिमानको रक्षा र देशको उन्नतिको सम्भावना छ । पार्टीलाई एकताबद्ध बनाउने मेरो मुख्य लक्ष्य हो, यो गर्छु,' उनले भने ।
पार्टीलाई एकताबद्ध बनाउन सबै नेता तथा कार्यकर्ता आ–आफ्नो ठाउँबाट लाग्नुपर्ने उनले बताए ।
यस्तै, अधिवेशनलाई सम्बोधन गर्दै अर्का नेता एनपी साउदले पार्टीको वैधानिकताका विषयमा आफूहरूले न्याय पाउने बताए ।
अर्का नेता मोहनबहादुर बस्नेतले गगन थापाले अरूको उक्साहटमा पार्टी कब्जा गर्ने प्रयास गरेको आरोप लगाए ।
बागमती प्रदेशका पूर्वअर्थमन्त्री कुन्दनराज काफ्लेले समयावधिअघि राजीनामा दिएकोमा मतदातासँग माफी मागेका छन् । 'प्रदेशसभाबाट राजीनामा दिएकोमा म आम दोलखाका मतदाता तथा शुभेच्छुकसँग माफी माग्छु । अबका दिनमा जनतासँग नसोधी कुनै निर्णय लिन्नँ,' उनले भने ।
अधिवेशनको बन्दसत्रले शनिबार नै नयाँ नेतृत्व चयन गर्ने आयोजकले बताएका छन् ।
