निधि भवनको सबै भौतिक संरचना विश्वविद्यालयलाई हस्तान्तरण गरिएको हो । स्थापनाको ९ वर्षदेखि भाडाकै घरमा रहेको विश्वविद्यालयले अत्याधुनिक र धेरै भवनसहितको संरचना पाएको हो ।
जनकपुर — नेपाल सरकारले जनकपुरमा मुख्यालय रहेको राजर्षी जनक विश्वविद्यालयलाई महेन्द्र नारायण निधि मिथिला सांस्कृतिक भवन हस्तान्तरण गरेको छ । जनकपुरमा रहेको निधि भवनमा शैक्षिक र प्रशासनिक काम गर्नेगरी भवन हस्तान्तरण गरिएको हो ।
नेपाल सरकारको शुक्रबारको निर्णयअनुसार निधि भवनको सबै भौतिक संरचना विश्वविद्यालयलाई हस्तान्तरण गरिएको हो । स्थापनाको ९ वर्षदेखि भाडाकै घरमा रहेको विश्वविद्यालयले अत्याधुनिक र धेरै भवनको संरचना रहेको निधि भवन पाएको हो ।
विश्वविद्यालय र महेन्द्र नारायण निधि मिथिला सांस्कृतिक भवन दुवैको स्थापनामा भूमिका निर्वाह गरेका पूर्वमन्त्री एवं कांग्रेसका देउवा पक्षीय नेता विमलेन्द्र निधि शनिबार निधि भवनमा पुगेर विश्वविद्यालयका पदाधिकारीहरुसित खुसी साटासाट गरे । उनले आफ्नो इच्छा पनि यी दुवै संस्थालाई एउटै छातामुनि राख्ने रहेको र त्यसअनुसार नै संघीय सरकारले निधि भवन विश्वविद्यालयलाई हस्तान्तरण गरेकामा खुसी व्यक्त गरे ।
विश्वविद्यालयले निधि भवनमा मिथिला संस्कृति र परम्परालाई बढावा दिने गतिविधि गर्ने जनाएको छ । विश्वविद्यालयले यसै वर्ष ३ वटा अन्तर्राष्ट्रिय सम्मेलन पनि निधि भवनमै आयोजना गर्ने भएको छ । निधि भवनमा अत्याधुनिक सभाहल, दुईतले प्रशासनिक भवन र अन्य संचरनाहरु छन् ।
अजित पत्रकार तिवारी कान्तिपुरका जनकपुर संवाददाता हुन् ।
