काठमाडौं । नेपाल प्रिमियर लिग (एनपीएल) को तेस्रो संस्करण लिग चरणको निर्णायक मोडमा पुगेको छ। १८ खेल सकिँदा अब बाँकी रहेका १० खेलले आठ टोलीमध्ये कुन चार टोली प्लेअफमा पुग्ने भन्ने तस्बिर तय गर्नेछन्।
अहिलेको अंकतालिकामा लुम्बिनी लायन्स ७ अंकसहित शीर्ष स्थानमा छ। ६–६ अंकका साथ काठमाडौं गोर्खाज र सुदूरपश्चिम रोयल्स क्रमशः दोस्रो र तेस्रो स्थानमा छन् भने ५ अंक जोडेको चितवन राइनोज चौथो स्थानमा छ। तर शीर्ष चारको यो समीकरण अझै सुरक्षित छैन।
जनकपुर बोल्ट्स, कर्णाली याक्स र विराटनगर किंग्सले समान ४–४ अंक जोड्दै प्लेअफ दौडलाई खुला राखेका छन्। अंकतालिकाको पुछारमा रहेको पोखरा एभेन्जर्स भने चार खेलमा लगातार हारसँगै अंकविहीन छ। यद्यपि गणितीय रूपमा उसको सम्भावना अझै समाप्त भइसकेको छैन।
लिग चरणका २८ मध्ये १८ खेल सकिँदा कुनै पनि टोलीले प्लेअफमा आफ्नो स्थान पक्का गर्न सकेको छैन। यही कारण अब प्रत्येक खेलको महत्व बढेको छ। एउटा जितले टोलीलाई शीर्ष चारतर्फ बलियोसँग धकेल्न सक्छ भने एउटा हारले अरूको नतिजामा निर्भर हुने अवस्था सिर्जना गर्न सक्छ।
पाँच खेलबाट ७ अंक जोडेको लुम्बिनीलाई बाँकी दुई खेलमध्ये एक जितले पनि प्लेअफ यात्रालाई निकै सहज बनाउन सक्छ। कर्णाली र विराटनगरसँग खेल्न बाँकी रहेको लुम्बिनी दुवै खेल जिते ११ अंकमा पुग्नेछ।
तर पछिल्लो खेलमा काठमाडौंसँग ३६ रनले पराजित भएपछि लुम्बिनीको शीर्षस्थानको यात्रा भने चुनौतीरहित छैन। बाँकी दुई खेलमा खराब नतिजा आए अन्य टोलीको समीकरणले उसलाई समेत दबाबमा पार्न सक्छ।
काठमाडौंको अवसर, शीर्षस्थानसम्मको सम्भावना
चार खेलबाट तीन जितसहित ६ अंक जोडेको काठमाडौं गोर्खाज अहिले सबैभन्दा राम्रो अवस्थामा रहेका टोलीमध्ये एक हो। उसले चितवन, सुदूरपश्चिम र पोखरासँग खेल्न बाँकी छ।
तीनमध्ये दुई खेल जिते काठमाडौं १० अंकमा पुग्नेछ भने सबै खेल जित्न सके १२ अंकसहित लिग चरणको शीर्षस्थानका लागि बलियो दाबेदार बन्नेछ। अझ चितवन र सुदूरपश्चिमविरुद्धको जितले प्रतिद्वन्द्वीको प्लेअफ समीकरणमा समेत प्रत्यक्ष असर पार्नेछ।
सुदूरपश्चिम र चितवनका लागि निर्णायक खेल
पहिलो र दोस्रो संस्करणमा लिग चरणमा प्रभावशाली प्रदर्शन गरेको सुदूरपश्चिम रोयल्स यसपटक पनि ६ अंकसहित शीर्ष तीनमा छ। तर उसको यात्रा अझै निश्चित छैन। जनकपुर र काठमाडौंविरुद्ध बाँकी रहेका दुई खेलले सुदूरपश्चिमको भविष्य निर्धारण गर्नेछन्।
चितवन राइनोजसँग भने तीन खेल बाँकी छन्। काठमाडौं, जनकपुर र कर्णालीसँगको प्रतिस्पर्धाले चितवनलाई प्लेअफमा पुर्याउने मात्र होइन, अंकतालिकामा अझ माथि उक्लने अवसर पनि दिनेछ।
अंकतालिकाको पाँचौं, छैटौं र सातौं स्थानमा रहेका जनकपुर, कर्णाली र विराटनगरबीचको प्रतिस्पर्धा झन् रोचक छ। तीनै टोलीसँग ४–४ अंक छ, तर खेल संख्या र नेट रनरेट फरक छन्।
जनकपुरसँग सुदूरपश्चिम र चितवनविरुद्ध दुई खेल बाँकी छन्। दुवै खेल जिते पनि उसको अन्तिम स्थान अन्य टोलीको नतिजा र नेट रनरेटमा निर्भर हुन सक्छ।
कर्णालीसँग भने पोखरा, लुम्बिनी र चितवनविरुद्ध तीन खेल खेल्ने अवसर छ। त्यसैले ४ अंकमा रहेका टोलीमध्ये कर्णालीसँग आफ्नो भविष्य आफैं बलियो बनाउने पर्याप्त अवसर छ।
विराटनगरले पोखरा र लुम्बिनीसँग खेल्न बाँकी छ। दुवै खेल जित्नैपर्ने दबाबमा रहेको विराटनगरले अब अर्को गल्ती गर्ने ठाउँ लगभग गुमाइसकेको छ।
चार खेलमा चारै खेल गुमाएको पोखरा एभेन्जर्सको अवस्था सबैभन्दा कठिन छ। कर्णाली, विराटनगर र काठमाडौंविरुद्ध बाँकी रहेका तीनै खेल जिते पनि पोखरा बढीमा ६ अंकमा मात्र पुग्नेछ।
त्यसैले पोखरालाई अब आफ्ना सबै खेल जित्नुका साथै अन्य टोलीको नतिजा पनि अनुकूल आउनुपर्नेछ। एउटा अर्को हारले भने उसको प्लेअफ सम्भावनालाई झन् कमजोर बनाउनेछ।
बाँकी १० खेलमध्ये पहिलो दिन कर्णाली याक्स र पोखरा एभेन्जर्स आमनेसामने हुनेछन्। सोही दिन चितवन राइनोजले काठमाडौं गोर्खाजसँग प्रतिस्पर्धा गर्नेछ।
त्यसपछि सुदूरपश्चिम र जनकपुर, कर्णाली र लुम्बिनी, काठमाडौं र सुदूरपश्चिम तथा जनकपुर र चितवनबीचका खेल हुनेछन्। अन्तिम चरणमा विराटनगर–लुम्बिनी, चितवन–कर्णाली र पोखरा–काठमाडौंका खेलले लिग चरणको अन्तिम तस्बिर पूरा गर्नेछन्।
अहिलेको अंकतालिकाले लुम्बिनी, काठमाडौं, सुदूरपश्चिम र चितवनलाई तुलनात्मक रूपमा बलियो अवस्थामा देखाए पनि जनकपुर, कर्णाली र विराटनगरको सम्भावना समाप्त भएको छैन। पोखराका लागि भने अबको यात्रा निकै कठिन छ।
एनपीएलको यस संस्करणमा अब खेलको संख्या मात्र घट्दै छैन, टोलीहरूको गल्ती गर्ने अवसर पनि सकिँदै छ। कुनै टोलीको एउटा जितले प्लेअफको ढोका खोल्न सक्छ भने अर्को टोलीको एउटा हारले प्रतियोगिताबाट बाहिरिने अवस्था सिर्जना गर्न सक्छ।
त्यसैले अबका १० खेल केवल जित र हारको प्रतिस्पर्धा हुने छैनन्, आठ टोलीमध्ये कसको प्लेअफ सपना पूरा हुन्छ र कसको अधुरै रहन्छ भन्ने फैसला पनि यिनै खेलले गर्नेछन्।
प्रकाशित: २३ कार्तिक २०८३ ०७:४४ सोमबार
