अन्तराष्ट्रिय बजारमा सुनको मूल्य दुई साता यता दुई प्रतिशतभन्दा धेरैले बढेको रोयटर्सले उल्लेख गरेको छ।
काठमाडौँ — सुनको मूल्य एकै दिन १३ हजार तीन सय रूपैयाँले बढेको छ। बिहीबार नेपाली बजारमा सुन तोलाको दुई लाख ८८ हजार ९ सय रूपैयाँमा कारोबार भइरहेको छ ।
तिहारको धनतेरसमा सुनको माग केही बढ्ने भएपनि नेपाली मागकै कारण भने यहाँ मूल्य बढेको होइन । अन्तराष्ट्रिय बजारमा चलेको मूल्यको आधारमा नेपालमा हरेक दिन बिहान ११ बजे मूल्य तोकिने गरिन्छ ।
अहिले अन्तराष्ट्रिय बजारमा सुनको मूल्य दुई साता यता दुई प्रतिशतभन्दा धेरैले बढेको रोयटर्सले उल्लेख गरेको छ ।
अन्तराष्ट्रिय बजारमा भौतिक रूपमा पाइने सुन प्रतिऔंस ४१३४ डलरमा कारोबार भइरहेको छ । त्यस्तै, सुनको करारपत्र लगायतको कारोबारमा भने सुन प्रतिऔंस ४१४४ डलरमा कारोबार भइरहेको छ ।
अमेरिकी डलर कमजोर हुँदा, भू–राजनीतिक तनाव बढिरहेको र केन्द्रीय बैंकहरूले सुनको सञ्चिति बढाइरहेको जस्ता कारणले नै अन्तर्राष्ट्रिय बजारमा सुनको मूल्य बढ्ने गर्छ ।
अहिले भने अमेरिकाको मध्यावधि निर्वाचनमा डेमोक्र्याटिक पार्टीले दुवै सदनमा बहुमत हासिल गरेपछि सुनको मूल्यमा प्रभाव परेको हो ।
डेमोक्र्याटिक पार्टीले दुवै सदनमा बहुमत हासिल गरेपछि राष्ट्रपति डोनाल्ड ट्रम्पको आर्थिक नीतिमा अवरोध आउन सक्ने विश्लेषण गरिएको छ ।
निर्वाचन परिणामपछि अमेरिकी डलर कमजोर भएको छ। सरकारी ऋणपत्रको प्रतिफल घटेको छ। यसले सुनको मूल्य बढाउन थप सहयोग गरेको छ ।
अमेरिकी केन्द्रीय बैंकले आगामी डिसेम्बरमा नीतिगत ब्याजदर बढाउने सम्भावना रहेको लगानीकर्ताहरूको बुझाई छ ।
मूल्य बढिरहेपनि तिहारको कारण बढ्दै माग
नेपालमा भने तिहारमा सुन र चाँदीको मागमा केही सुधार हुने नेपाल सुनचाँदी व्यवसायी महासंघका पुर्व अध्यक्ष तेजरत्न शाक्य बताउँछन् ।
उनी भन्छन्, ‘सामान्यतया तिहारको धनतेरसमा अन्य दिनको तुलनामा चाँदीको कारोबार ५० प्रतिशतसम्म र सुनको कारोबार २५ प्रतिशतसम्म बढ्ने गर्छ ।’
बुधबारबाट सुनको सिक्का, ढिक्का (बार) लगायतको बारेमा ग्राहकहरूबाट सोधिखोजी भइरहेको उनी बताउँछन् ।
सुनका ढिक्काको कारोबार गर्न कानुनतः बर्जित गरिएको भएपनि यस्तो कारोबार नरोकिएको समेत उनी बताउँछन् ।
तिहारमा धनतेरसको दिन सुनका गहनाभन्दा पनि सिक्का, ढिक्का, चाँदीका सिक्काको माग धेरै हुने गरेको छ ।
तर, सुनको मूल्य बढ्दो क्रममा देखिएकोले ग्राहकहरूलाई महंगो पर्ने भएको छ ।
(182).png)
