उमेरले फेसन र सौन्दर्यको रुचि सीमित गर्दैन, आफूलाई सुहाउने पहिरन, मेकअप र शैली अपनाएर स्टाइलिस अनि स्मार्ट देखिन सकिन्छ ।
काठमाडौँ — ४० वर्ष कटेपछि फेसन र सौन्दर्यमा ध्यान दिनु हुँदैन भन्ने सोच अब पुरानो हुँदै गएको छ । उमेर बढ्दै जाँदा पनि आफूलाई मन पर्ने पहिरन लगाउने, मेकअप गर्ने र आफ्नै शैलीमा सजिने चाहना स्वाभाविक हो । स्टाइलिस देखिन महँगो कपडा वा धेरै मेकअप नै चाहिन्छ भन्ने पनि छैन । आफ्नो व्यक्तित्व, रुचि र सहजतालाई ध्यानमा राखेर पहिरन तथा सौन्दर्य सामग्री छनोट गरे पुग्छ । स्टाइलिस देखिन चाहनेका लागि उपयोगी हुन सक्छन् यी १० टिप्स :
१. शरीरअनुसार मिल्ने पहिरन छनोट गर्नुहोस्
धेरै टाइट वा बढी खुकुलो कपडाभन्दा शरीरको बनावट र आकारअनुसार मिल्ने पहिरन रोज्नुहोस् । सही फिटिङका कपडाले व्यक्तित्वलाई निखार्नुका साथै सहज महसुस गराउँछन् ।
२. आफूलाई सुहाउने रङ प्रयोग गर्नुहोस्
पेस्टल, बेज, अफ–ह्वाइट, ल्याभेन्डर, पाउडर ब्लु, पिंक वा ओलिभ ग्रिनजस्ता रङ प्रयोग गर्न सकिन्छ । एउटै रङका विभिन्न सेड मिलाएर पहिरन लगाउँदा पनि आकर्षक देखिन्छ ।
३. हल्का र प्राकृतिक मेकअप गर्नुहोस्
धेरै मेकअप गर्नुभन्दा छालाको हेरचाहमा ध्यान दिनुहोस् । मोइस्चराइजर, सनस्क्रिन, हल्का ब्लस र प्राकृतिक लिप कलरको प्रयोगले स्वाभाविक सौन्दर्य निखार्न मद्दत गर्छ ।
केश सफा र व्यवस्थित राख्नुहोस् । आफ्नो रुचिअनुसार सोल्डर लेन्थ कट, सफ्ट लेयर वा वेभ्सजस्ता हेयरस्टाइल अपनाउन सकिन्छ । प्राकृतिक सेतो केश राख्ने वा कलर गर्ने भन्ने निर्णय पनि आफ्नै रुचिमा निर्भर हुन्छ ।
५. फेसनभन्दा आरामलाई प्राथमिकता दिनुहोस्
राम्रो देखिनकै लागि असहज कपडा लगाउनु आवश्यक छैन । शरीरलाई सहज हुने हल्का र नरम कपडा छनोट गर्नुहोस् । को–अर्ड सेट, ट्युनिक, म्याक्सी ड्रेस, लामो कुर्ता र आरामदायी पाइन्ट विकल्प हुन सक्छन् ।
६. साडी लगाउँदा पनि सहजतालाई ध्यान दिनुहोस्
साडी लगाउन मन पराउनेले आफ्नो सुविधाअनुसार पेटिकोट छनोट गर्न सक्छन् । इलास्टिक भएको पेटिकोटले सहज महसुस गराउन सक्छ । लामो समय साडी लगाउनुपर्ने अवस्थामा कपडाको फिटिङ र बाँध्ने तरिकामा ध्यान दिनुहोस् ।
७. घरमा पनि सहज र व्यवस्थित पहिरन लगाउनुहोस्
घरमा लगाउने कपडा पनि सफा, सहज र आफूलाई मन पर्ने हुनुपर्छ । कटनको पाइन्ट–टिसर्ट, सर्ट वा हल्का कुर्ता दैनिक प्रयोगका लागि उपयुक्त विकल्प हुन् ।
८. सही गहना र जुत्ता छनोट गर्नुहोस्
हल्का चेन, पर्ल इयररिङ, सानो झुम्का, घडी वा क्लासिक ह्यान्डब्यागले पहिरनलाई आकर्षक बनाउन सक्छन् । जुत्ता छनोट गर्दा आफ्नो सुविधाअनुसार सहज र राम्रो सपोर्ट दिने विकल्प रोज्नुहोस् ।
९. आत्मविश्वासका साथ आफूलाई प्रस्तुत गर्नुहोस्
स्टाइलिस देखिन महँगो कपडा वा धेरै मेकअप आवश्यक पर्दैन । आफूलाई मन पर्ने पहिरन लगाउनुहोस् र आफ्नो व्यक्तित्वलाई सहज रूपमा प्रस्तुत गर्नुहोस् । आत्मविश्वासले आफ्नो शैलीलाई अझ स्वाभाविक बनाउन मद्दत गर्छ ।
१०. उमेरभन्दा आफ्नो खुसीलाई प्राथमिकता दिनुहोस्
४० वर्ष कटेपछि फेसन छोड्नुपर्छ भन्ने कुनै नियम छैन । अरूको धारणाभन्दा आफूलाई के मन पर्छ र के लगाउँदा सहज महसुस हुन्छ भन्ने कुरालाई महत्त्व दिनुहोस् । आफ्नो रुचि, खुसी र आत्मविश्वासलाई प्राथमिकता दिनु नै आफ्नै शैलीमा बाँच्ने राम्रो तरिका हो ।
