जिल्ला क्रिकेट संघपाल्पा र दमकडा क्रिकेट क्लबको आयोजनामा भएको प्रतियोगिताको शुक्रबार सम्पन्न फाइनलमा करुवा क्रिकेट क्लबले पाल्पाली क्रिकेट प्लेयर्सलाई ७६ रनले हरायो ।
पाल्पा — करुवा क्रिकेट क्लब तानसेनले शुक्रबार पाल्पा च्याम्पियन्स ट्रफी जिल्लास्तरीय क्रिकेट लिगको उपाधि जितेको छ ।
जिल्ला क्रिकेट संघपाल्पा र दमकडा क्रिकेट क्लबको आयोजनामा भएको प्रतियोगिताको शुक्रबार सम्पन्न फाइनलमा करुवा क्रिकेट क्लबले पाल्पाली क्रिकेट प्लेयर्सलाई ७६ रनले हरायो ।
वर्षाका कारण छोट्याइएको खेलमा पहिले ब्याटिङ रोजेको करुवाले निर्धारित १२ ओभरमा ३ विकेट गुमाई १ सय ६५ रन बनायो । दिनेश बुढामगरले ६७, नीरबहादुर सार्कीले ५१, लीला शर्माले १५ र मनिष न्यौपानेले १४ रन जोडे । पाल्पालीका लेखनाथ न्यौपाने र दिपेश पाण्ड्येले १–१ विकेट लिए । जवाफमा पाल्पाली क्रिकेट प्लेयर्सले ४ विकेटमै ८९ रनमा समेटियो । आशिष लोहनीले २४, शिव खनालले २१ र दिपेश पाण्ड्येले ११ रन जोडे । करुवाका दिनेश बुढामगरले २ र केशव पहराईले एक विकेट लिए ।
विजेता करुवाले ७५ हजार र उपविजेता पाल्पालीले ४० हजार रुपैयाँ पुरस्कार पाए । विजेता खेलाडीलाई तानसेन नगरपालिकाका प्रमुख सन्तोषलाल श्रेष्ठ र लुम्बिनी प्रदेश खेलकुद विकास समितिका सदस्य राजु महर्जन, जिल्ला क्रिकेट संघ पाल्पाका अध्यक्ष पूर्णराज शाक्य, दमकडा क्रिकेट क्लबका अध्यक्ष छवि भटराईले पुरस्कार वितरण गरे ।
उत्कृष्ट बलर पाल्पालीका थानेश्वर भटराई र उत्कृष्ट ब्याटर करुवाका मनिष न्यौपाने ५–५ हजार पाए । प्लेयर अफ द सिरिज करुवाका दिनेश बुढामगर भए । उनले ७ हजार पाए । उदीयमान खेलाडी फ्रेन्ड्स ब्वाइजका साहिद अलीलाई ३ हजार प्रदान गरिएको छ । फाइनलका प्लेयर अफ द म्याच दिनेश बुढामगर भए । जिल्लाका ६ टोली सहभागी प्रतियोगितामा भाग लिएका थिए ।
माधव अर्याल कान्तिपुरका पाल्पा संवाददाता हुन् ।
_.jpg)
