१५औँ महाधिवेशनबाट चुनिएका पदाधिकारी र केन्द्रीय सदस्यहरूले पद तथा गोपनीयताको शपथ लिएसँगै पार्टीको नयाँ कार्यसमिति सक्रिय हुनेछ।
काठमाडौँ — नेपाली कांग्रेसको १५औँ महाधिवेशनबाट निर्वाचित पदाधिकारी तथा केन्द्रीय सदस्यहरूको आज अपराह्न पार्टी केन्द्रीय कार्यालय सानेपामा शपथ हुँदैछ । सभापति गगन थापाले दसैंको फूलपातीका दिन शपथ लिएका थिए ।
आज वरिष्ठ उपसभापति, चार उपसभापति, तीन महामन्त्री र ११ सहमहामन्त्रीसहित २२९ जनाले पद तथा गोपनीयताको शपथ लिने कार्यक्रम छ ।
आज शपथ लिने २२९ जनामध्ये १९ जना पदाधिकारी र २१० जना केन्द्रीय सदस्य छन् । पदाधिकारीमा वरिष्ठ उपसभापति एक, उपसभापति चार, महामन्त्री तीन र सहमहामन्त्री ११ जना छन् ।
गत असोज १८ देखि २३ गतेसम्म सम्पन्न महाधिवेशनबाट सभापतिसहित २३१ जना केन्द्रीय कार्यसमितिमा निर्वाचित भएका थिए । तर, महिला खुलातर्फ निर्वाचित विनिता खड्काको निर्वाचन परिणाम भने छानबिनका कारण रोकिएको छ । उनको परिणाम औपचारिक रूपमा सार्वजनिक नभएकाले २३० जनाको मात्रै निर्वाचन परिणाम आएको छ ।
सभापति थापाले दसैंको फूलपातीका दिन असोज ३१ गते नै पद तथा गोपनीयताको शपथ लिइसकेका छन् । त्यसैले आज सभापतिबाहेक औपचारिक परिणाम सार्वजनिक भएका बाँकी पदाधिकारी तथा केन्द्रीय सदस्यहरूको शपथ हुन लागेको हो ।
कांग्रेसको विधानअनुसार २९७ सदस्यीय केन्द्रीय कार्यसमितिमा सभापतिले ६६ जना सदस्य मनोनीत गर्न पाउने व्यवस्था छ । निर्वाचित सदस्यहरूको शपथपछि सभापति थापाले मनोनीत गर्ने सदस्यहरूको चयन प्रक्रिया अघि बढाउने भएका छन् ।
